اسلام آباد(مانیٹرنگ ڈیسک)تحریک انصاف ن لیگ کی وکٹیں اڑاتے اڑاتے خود کلین بولڈ ہو گئی۔ لیگی رکن پنجاب اسمبلی نادیہ عزیز کی شمولیت نے پی ٹی آئی میں پھوٹ ڈال دی، سرگودھا سے ٹکٹ کے تمام امیدواروں نے خاتون رکن کو ٹکٹ دینے پر مخالفت کرنے کا اعلان کر دیا۔ تفصیلات کے مطابق تحریک انصاف ن لیگ کی وکٹیں اڑاتے اڑاتے خود کلین بولڈ ہو گئی ہے اور اس وقت سرگودھا سے
منتخب ن لیگ کی رکن پنجاب اسمبلی نادیہ عزیز کی تحریک انصاف میں شمولیت نے کپتان کو شش و پنج میں ڈال دیا ہے۔ نادیہ عزیز کی تحریک انصاف میں شمولیت اور تحریک انصاف کی جانب سے ممکنہ طور پر ٹکٹ دئیے جانے کے فیصلے کے خلاف سرگودھا کے قومی و صوبائی اسمبلی کے ٹکٹ امیدواروں نے ایکا کر لیا ہے اور واضح طور پر قیادت کو اپنے اس فیصلے سے آگاہ کرتے ہوئے کہا ہے کہ اگر نادیہ عزیز کو ٹکٹ دیا گیا تو اس کی مخالفت کرینگے۔ قومی اسمبلی کے حلقہ این اے 90، پی پی 77،پی پی 78 کے امیدواروں کی طرف سے چیئر مین پارلیمانی بورڈ کو دی گئی مشترکہ درخواست میں موقف اپنایاگیا کہ مقررہ وقت میں درخواستیں دینے والوں میں سے جسے پارٹی نے ٹکٹ دیا دل وجان سے اسے کامیاب کرانے کے لئے جہدوجہد کریں گے لیکن اگر چور دروزے سے ٹکٹ حاصل کرنے کے لیے داخل ہونے والوں کو ٹکٹ دی گئی تو مذمت کریں گے اور استدعا کی گئی ہے کہ سرگودھا کی ٹکٹوں کا فیصلہ درخواست گزارامیدواروں کی رائے کے بغیر نہ کیا جائے۔ذرائع کے مطابق پی ٹی آئی میں یہ صورت حال ن لیگی ایم پی اے نادیہ عزیز کی پی ٹی آئی میں متوقع شمولیت کے باعث پیدا ہوئی۔درخواست دینے والوں میں ممتاز کاہلوں،عنصر مجید نیازی،ملک شعیب اعوان،راؤسرور،مہر منصور حیات لک،راؤ راحت علی خان،محسن رضا،ذوالفقار بھٹی،ملک ارشد اعوان،شہزاد قریشی،راو مدثر،ملک ہمایوں اعوان،فیاض احمد اوٹھی،محمود بخش گیلانی،نوید اسلم وڑائچ اورشہباز باجوہ ایڈووکیٹ شامل ہیں۔
