اسلام آباد(مانیٹرنگ ڈیسک)نواز شریف کے بعد خواجہ آصف کی تاحیات نا اہلی کے بعد چوہدری نثار نے پارٹی میں متحرک ہونے لگ گئے۔ قومی اخبار کی رپورٹ کے مطابق نواز شریف کے بعد خواجہ آصف کی تاحیات نا اہلی نے چوہدری نثار کو ایک بار پھر پارٹی میں متحرک بنا دیا ہے۔ مسلم لیگ ن کے ذرائع کے مطابق چوہدری نثار کے قریبی حلقوں نے چوہدری نثار کو پارٹی چھوڑ کر جانے
کی بجائے آئندہ پارلیمنٹ میں اپنا اہم رول ادا کرنے کا مشورہ دیا ہے۔ مسلم لیگ ن کے ذرائع کے مطابق چوہدری نثار نے ن لیگ کے اہم رہنمائوں کو نا صرف اس بات کی یقین دہانی کروا دی ہے کہ وہ پارٹی میں رہیں گے بلکہ ن لیگ کے اہم ترین ذمہ داران سے بھی چوہدری نثار کے رابطے ہوئے ہیں۔ ذرائع کے مطابق خواجہ آصف چوہدری نثار کے ساتھ اختلافات رکھتے تھے، اسی طرح اسحاق ڈار کے بھی آخری دنوں میں نثار کے ساتھ اختلافات پیدا ہو گئے تھے۔ اب اسحاق ڈار کے پاکستان نہ آنے کے زیادہ تر امکانات اور نئے وزیر خزانہ کے آنے کے بعد جب پارلیمنٹ کی سیاست میں خواجہ آصف کے آئوٹ ہونے اور آئندہ چند دنوں میں مزید اہم ن لیگیوں کی متوقع گرفتاریوں کے بعد چوہدری نثار کیلئے ن لیگ کا میدان نہ صرف کھلا ہو گا بلکہ شہباز شریف بھی یہی چاہیں گے کہ نثار کے ن لیگ میں رہنے سے اداروں کے ساتھ فاصلے کم ہوں۔ ذرائع کے مطابق نواز شریف کی سزا کی صورت میں مسلم لیگ کے ٹکٹ دینے والے بورڈ میں بھی چوہدری نثار کا اہم ترین رول ہو گا، نثار کو پیغام بھی دیا گیا ہے کہ نواز شریف کو سزا ہونے کی صورت میں مسلم لیگ ن کے اندر ان کو اہم ترین ذمہ داری دی جا سکتی ہے۔ ذرائع کے مطابق نثار کی اس وقت پارٹی کے خلاف خاموشی بھی اسی وجہ سے ہے اور ذرائع نے بھی اس بات کو کنفرم کیا ہے کہ نثار کو آئندہ انتخابات میں ن لیگ کی ہی
طرف سے دو حلقوں سے الیکشن لڑنے کی دعوت دی جائے۔ ذرائع کے مطابق ن لیگ کی ایک اہم شخصیت نے یہاں تک پیغام دیا ہے کہ پنجاب یا مرکز دونوں میں اہم ترین ذمہ داری ان کو دی جائے گی۔ نثار کا ذاتی گروپ بھی اسی وجہ سے متحرک ہے اور اس گروپ نے پارٹی کے اندر آئندہ کی حکمت عملی کیلئے رابطے تیز کر دئیے ہیں اور پنڈی سے تعلق رکھنے والے ایک بڑے گروپ کی بھی انہیں
مکمل حمایت حاصل ہے۔ ذرائع کے مطابق نثار کے ہاتھ میں پارٹی کی اہم پوزیشن آنے کی صورت میں ن لیگ کو چھوڑنے کی تیاریوں میں مصروف بڑا گروپ اپنا ارادہ تبدیل کرنے لگاہے۔ واضح رہے کہ بجٹ اجلاس میں چوہدری نثار کی آمد نے اپوزیشن سمیت حکومتی بنچوں کو بھی حیران کر دیا تھا۔ چوہدری نثار کے اسمبلی ہال پہنچتے ہی بڑی تعداد میں اراکین اسمبلی جن میں ن لیگ کے
علاوہ اپوزیشن اور دیگر جماعتوں کے اراکین شامل تھے ان سے ملنے کیلئے ان کے گرد جمع ہو گئے۔ اس موقع پر وزیراعظم پاکستان شاہد خاقان عباسی بھی چوہدری نثار کے ساتھ کھڑے رہے اور اراکین اسمبلی سے ملاقاتیں کرتے رہے۔
