اسلام آباد(مانیٹرنگ ڈیسک) وزیراعظم کے مشیر برائے ہوا بازی سردار مہتاب احمد خان نے کہا ہے کہ بین الاقوامی معیار کے مطابق جدید سہولیات سے آراستہ پاکستان کا سب سے بڑا نیو اسلام آبا دا نٹرنیشنل ائیر پورٹ رواں سال اپریل کے آخری عشرے میں آپریشنل کر دیا جائے گا۔ انہوں نے متعلقہ حکام کو ہدایت کی کہ ٹائم فریم کے مطابق منصوبے کی بروقت تکمیل اور کام کے معیار پر کوئی سمجھوتہ برداشت نہیں کیا جائے گا۔
انہوں نے ائیر پور ٹ کی بر وقت تکمیل اور آپریشنل تیاری کے حوالے سے متلعقہ حکام سے تفصیلی رپورٹ طلب کی ہے۔ ان خیالات کا اظہار انہوں نے پیرکے روز نیو اسلام آباد انٹرنیشنل ائیر پورٹ کے معائنہ کے دوران کیا۔ اس موقع پر ایوی ایشن ڈویژن، سول ایوی ایشن اتھارٹیاینٹی نارکوٹکس اور پی آئی اے کے متعلقہ حکام بھی موجود تھے۔ مشیر ہوابازی کو اس موقع پر منصوبے کی بروقت تکمیل اور آپریشنل تیاری کے حوالے سے ایک تفصیلی بریفنگ بھی دی گئی۔ سردار مہتاب کو بتایا گیا کہ 85 بلین کی لاگت سے تکمیل ہونے والا جدید سہولیات سے آراستہ پاکستان کا سب سے بڑا ,ائیر پورٹ بین الاقوامی معیار سے آراستہ ہے جبکہ اس جدید ائیر پورٹ پر سالانہ 9 ملین مسافروں کی گنجائش ہو گی نیز اس ائیر پورٹ پر کثیر المنزلہ کار پارکنگ، 15مسافر بورڈنگ لاؤجزکی سہولیات بھی موجود ہو ں گی۔مشیر ہوابازی کو بتایاگیا کہ ائیر پورٹ پر 2رن ویز سمیت جدید لینڈنگ سسٹم اور بین الاقوامی معیار کا ریڈار سسٹم بھی نصب کیا گیا ہے۔ اس موقع پر مشیر ہوابازی نے ائیر پورٹ کے مختلف حصوں کا معائنہ کیا اور ہدایت کی کہ مقررہ ٹائم فریم کے مطابق کام کے معیار کو ہر صورت میں یقینی بنایا جائے۔ انہوں نے سول ایوی ایشن اتھارٹی اور پی آئی اے کے حکام کو ہدایت کہ کہ روابط کو مزید بہتر کیا جائے اور خامیوں کی نشاندہی کرکے اسے فوری طور پر حل کیا جائے تاکہ ائیر پورٹ کو مقررہ مدت میں آپریشنل کیا جا سکے ۔سردار مہتاب احمد خان نے مزید ہدایت کی کے تمام ائیر لائینز کے آپریشنز کو یقینی بنانے کیلیے انکو بھی سہولیات فراہم کی جائیں ۔انہوں نے ہدایت کی مسافروں کی سہولت کو مدنظر رکھتے ہوئے سائن بورڈز کو بہتر انداز میں نصب کیا جائے تاکہ وہ ان سے مطلوبہ راہنمائی حاصل کر سکیں۔ بعد ازاں مشیر ہوابازی نے ائیر پورٹ پر پودا بھی لگایا انھوں نے اس موقع پر اس عزم کا اعادہ کیا کہ موجود حکومت پی آئی اے کوہر ممکن انفراسٹیکچر مہیا کرنے کے لیے کوشاں ہے ۔
