اسلام آباد (نیوزڈیسک)چیئرمین سینیٹ صادق سنجرانی نے کہاہے کہ کامیابی پر آصف علی زرداری اور عمران خان سمیت تمام دوستوں کا مشکور ہوں، ایوان بالا میں سب کو ساتھ لیکر چلوں گا، کسی کیساتھ کسی قسم کی نا انصافی نہیں ہوگی، صوبہ بلوچستان اور پاکستان کی تعمیر وترقی کیلئے اپنا بھرپورکردار ادا کرونگا۔سینیٹ اجلاس کے بعد صحافیوں سے بات چیت کرتے ہوئے انہوں نے کہا کہ آصف علی زرداری اور عمران خان سمیت ان تمام ساتھیوں کا شکر گزار ہوں جنہوں نے مجھے سپورٹ کیا۔
ایک سوال پر انہوں نے کہا کہ ایوان بالا میں سب کو ساتھ لیکر چلوں گا، کسی کے ساتھ کسی قسم کی نا انصافی نہیں ہونے دونگا۔ انہوں نے کہا کہ میرے لئے سب برابر ہیں۔ انہوں نے کہا کہ وزیراعلیٰ بلوچستان کا بھی مشکورہوں جنہوں نے میرا انتخاب کیا۔ بلوچستان اور پاکستان کی تعمیر وترقی کیلئے اپنا بھرپور کردارادا کرونگا۔ انہوں نے کہا کہ ایوان میں سب سینئر سیاستدان ہیں سب کارروائی سمجھتے ہیں ، ایوان کی کارروائی اچھے انداز میں چلائینگے کسی کو شکایت کا موقع نہیں ملے گا۔نومنتخب چیئرمین سینیٹ میر صادق سنجرانی نے پاکستان تحریک انصاف کے چیئرمین عمران خان کو ٹیلیفون کیا اور حمایت پر شکریہ ادا کیا ۔ تحریک انصاف کی جانب سے جاری اعلامئے کے مطابق نو منتخب چیئرمین نے کہا کہ بلوچستان کے عوام عمران خان کے تہہ دل سے مشکور ہیں ، انہوں نے کہا کہ عمران خان وفاق کی علامت کے طور پر ابھرے ہیں ، صادق سنجرانی نے کہا کہ بلوچستان کے عوام کو پارلیمان میں اہم مقام دلوانے پر عمران خان کے مشکور ہیں ۔ صادق سنجرانی نے کہا کہ آپ نے مجھ سے جو توقعات وابستہ کیں ان پر انشاء اللہ پورا اتروں گا۔
