واشنگٹن(آئی این پی ) امریکا میں پاکستان کے سفیر اعزاز چوہدری نے کہا ہے کہ پاک سر زمین کسی کے خلاف استعمال کرنے کی اجازت نہیں دیں گے،پاکستان نے دہشتگردی کے خلاف بے شمار قربانیاں دی ہیں، کامیاب فوجی آپریشن سے متاثرہ علاقے دہشتگردی سے پاک کردیئے ،پاکستان کا بدلتے حالات میں مثبت تشخص سامنے آیا ہے،امریکا سمیت مختلف ممالک سی پیک میں سرمایہ کاری کررہے ہیں ۔

پاکستان کے متعلق غلط تصوررد کرکے نئے انداز سے دیکھنا ہوگا، افغانستان کے مسئلے کا حل صرف مقامی اسٹیک ہولڈرز کے پاس ہے، پاکستان شراکت داروں سے مل کر افغانستان مسئلے کے حل میں مدد دے گا ، جنوبی ایشیا کے امن کے لیے افغان استحکام بہت ضروری ہے۔ گزشتہ روز یہاں واشنگٹن میں امریکی صحافیوں کے 8 رکنی وفد نے سفیراعزاز چوہدری سے ملاقات کی جس دوران پاکستان سے متعلق بریفنگ دیتے ہوئے پاکستانی سفیر نے کہا کہ پاکستان نے دہشتگردی کے خلاف بے شمار قربانیاں دیں ہیں تاہم اب پاک سر زمین کسی کے خلاف استعمال کرنے کی اجازت نہیں دیں گے۔ انہوں نے کہا کہ انسداد دہشت گردی آپریشن کے باعث معاشی اشاریے مثبت ہیں جس کے باعث پاکستان میں سیکیورٹی صورتحال بہترین اور شاندارہوگئی ہے۔انہوں نے صحافیوں کوبتایا کہ کامیاب فوجی آپریشن سے متاثرہ علاقے دہشتگردی سے پاک کردیئے جب کہ دہشت گردی سے پاک علاقوں میں معاشی اور ترقیاتی کام جاری ہے۔ پاکستانی سفیر نے کہا کہ پاکستان دہشتگردی اور مذموم عزائم کے خلاف ہے تاہم پاکستان کے متعلق غلط تصوررد کرکے نئے انداز سے دیکھنا ہوگا۔امریکی صحافیوں کے سوال پرانہوں نے کہا کہ پاکستان کا بدلتے حالات میں مثبت تشخص سامنے آیا ہے اورامریکا سمیت مختلف ممالک سی پیک میں سرمایہ کاری کررہے ہیں۔ انہوں نے واضح کیا کہ امریکا نے جب پاکستان کا ساتھ دیا تودونوں ممالک کا فائدہ ہوا۔

اس لیے امریکا سے اچھے تعلقات کی امید رکھتے ہیں۔پاک افغان مسئلے کے حوالے سے سوال پراعزاز چوہدری نے کہا کہ افغان عدم استحکام کا اثرپاکستان پرپڑا تاہم افغانستان کے مسئلے کا حل صرف مقامی اسٹیک ہولڈرز کے پاس ہے جس کے لیے پاکستان شراکت داروں سے مل کر افغانستان مسئلے کے حل میں مدد دے گا جب کہ جنوبی ایشیا کے امن کے لیے افغان استحکام بہت ضروری ہے۔