اسلام آباد (مانیٹرنگ ڈیسک)ن لیگ آج بہاولپور میں بھرپور سیاسی پاور شو کا مظاہرہ کرنے جا رہی ہے اور اسکے جلسے کی تمام تیاریاں مکمل کر لی گئی ہیں، پنڈال میں کرسیاں اور سٹیج سجا دیا گیا ہے۔ حکمران جماعت ن لیگ کے بہاولپور جلسے میں حکومتی وسائل استعمال کئے جانے کا انکشاف ہوا ہے۔ میڈیا رپورٹس کے مطابق ن لیگ کے بہاولپور جلسے جس سے نواز شریف اور مریم نواز نے خطاب کرنا ہے میں حکومتی مشینری کا بے دریغ استعمال کیا گیا ہے۔ تمام اضلاع کے سرکاری ملازمین کو جلسہ گاہ میں پہنچنے کی ہدایت کی گئی ہے
اور ہر محکمہ کا بڑا افسر اپنے محکمے کے اہلکاروں کی حاضری کا ذمہ دار مقرر کیا گیا ہے۔ اس کے علاوہ واپڈا کی تین سرکاری گاڑیاں جلسہ گاہ میں جنریٹر پہنچاتی رہیں۔ بتایا جاتا ہے کہ ن لیگ کی جانب سے جلسہ گاہ میں انتظامات مئیر بہاولپور اورسابق لیگی ایم پی اے سمیع اللہ چوہدری کے سپرد کئے گئے ہیں۔ جلسہ گاہ میں آویزاں کئے جانیوالے بینرز اور پوسٹرز بھی تحصیل میونسپلٹی کی جانب سے آویزاں کئے جانے کا انکشاف بھی سامنے آیا ہے جبکہ سرکاری اہلکاروں سے بلامعاوضہ جلسہ گاہ میں کام بھی کروایا گیا ہے۔
