اسلام آباد(آئی این پی )وزیر خارجہ خواجہ محمد آصف نے کہا ہے کہ امریکہ کیساتھ تعلقات میں تناؤ ہے ، دونوں ملکوں کے ایک دوسرے پر اعتبار کی کمی ہے ،ماضی میں امریکہ کیساتھ بہتر تعلقات رہے ہیں مگر آج کل دونوں جانب سے تعلقات اچھے نہیں ہیں ، امریکہ آج بھی ہماری فضائی حدود سے گزر کے افغانستان میں حملے کرتا ہے ، مشرف نے اپنی کتاب میں لکھا ہے کہ انہوں نے پاکستان سے لوگ پکڑ کر امریکہ کے حوالے کئے ،پاکستان نے 27افغانی پکڑ کر امریکہ کے حوالے کئے ہیں جو امریکہ کو مطلوب تھے ،

ہماری کوشش ہے کہ ہم گرے لسٹ میں کم سے کم عرصہ رہیں ، ہمیں دیے گئے ٹاسک اگر ہم جلدی مکمل کر لیں تو پھر ہم اس لسٹ سے نکل سکتے ہیں ، پاکستان کے روس کیساتھ تعلقات بہتر ہوئے ہیں ، ان کے ساتھ ایل این جی معاہدے پر کام جاری ہے ، ایل این جی معاہدے سے ملکی معیشت پر مثبت اثر پڑے گا ،میاں شہبازشریف وزارت عظمیٰ کیلئے بہترین امیدوار ہیں ، ان کی کارکردگی بھی لاجواب ہے ، میاں نوازشریف ایم این اے تک نہیں بن سکتے مگر طوطی پھر بھی انہی کا بول رہا ہے ، مریم نواز پارٹی کا مستقبل ہیں ان کو پبلک میں پذیرائی مل رہی ہے ، مریم نواز جو سیاست کر رہی ہیں وہ اس دور کی سیاست ہے ۔وہ منگل کو نجی ٹی وی کو انٹرویو دے رہے تھے ۔وزیر خارجہ نے کہا کہ امریکہ کیساتھ تعلقات میں تناؤ ہے ، دونوں ملکوں کے ایک دوسرے پر اعتبار کی کمی ہے ، ماضی میں امریکہ کیساتھ بہتر تعلقات رہے ہیں مگر آج کل دونوں جانب سے تعلقات اچھے نہیں ہیں ، 80کی دہائی میں لڑی گئی جنگ امریکہ ہماری مدد کے بغیر نہیں جیت سکتا تھا ۔ خواجہ آصف نے کہا کہ نائن الیون کے بعد بھی امریکہ کو ہماری ضرورت پڑی ہے تو ہم نے ان کی مدد کی ، امریکہ آج بھی ہماری فضائی حدود سے گزر کے افغانستان میں حملے کرتا ہے ، مشرف نے اپنی کتاب میں لکھا ہے کہ انہوں نے پاکستان سے لوگ پکڑ کر امریکہ کے حوالے کئے ، امریکہ نے پاکستان کو مطلوب افراد کی فہرست دی ، پاکستان نے 27افغانی پکڑ کر امریکہ کے حوالے کئے ہیں جو امریکہ کو مطلوب تھے ، جغرافیائی لحاظ سے امریکہ آج بھی پاکستان کو استعمال کررہا ہے ، ماضی میں نے ہم کئی غلطیاں کی ہیں ، ہم نے افغان جنگ کی بڑی بھاری قیمت ادا کی ہے ۔

انہوں نے کہا کہ افغان طالبان اور حکومت مل کر اگر اپنے معاملات کو مل بیٹھ کر ٹھیک کر لیتے تو اس سے اچھی اور نیک بات اور کوئی نہیں ہے ، بطور ہمسائے ہماری کوئی مدددرکار ہوئی تو ہم تیار ہیں ۔ وزیر خارجہ نے کہا کہ ہماری کوشش ہے کہ ہم گرے لسٹ میں کم سے کم عرصہ رہیں ، ہمیں دیے گئے ٹاسک اگر ہم جلدی مکمل کر لیں تو پھر ہم اس لسٹ سے نکل سکتے ہیں ، پاکستان نے بے پناہ قربانیوں کے بعد دہشت گردی کی آگ کو ٹھنڈا کیا ہے ، پیپلزپارٹی کی حکومت میں ہم ایف اے ٹی ایف کی دونوں لسٹوں میں رہے ہیں ۔ وزیر خارجہ نے کہا کہ پاکستان کے روس کیساتھ تعلقات بہتر ہوئے ہیں ، ان کے ساتھ ایل این جی معاہدے پر کام جاری ہے ، ایل این جی معاہدے سے ملکی معیشت پر مثبت اثر پڑے گا ۔ خواجہ آصف نے کہا کہ میاں نوازشریف کی بنائی پالیسیز کو ہی شاہد خاقان عباسی نے جاری رکھا ہوا ہے ، لودھراں حلقے میں جہانگیر ترین کی فتح کے بعد سے ہماری فتح تک ہم نے 70ہزار سے زائد ووٹ حاصل کیا ہے ۔ اس کو اگر کسوٹی بنا کے پرکھیں تو آپ ہمارے ووٹ بینک میں اضافے کا خود ہی اندازہ کر سکتے ہیں ، ہمارے اراکین نے آزادحیثیت سے سینیٹ الیکشن میں حصہ لیا ، تین ،چار مہینے میں عام انتخابات ہونے والے ہیں ، انشاء اللہ مسلم لیگ (ن) بھاری اکثریت سے کامیاب ہوگی ، ہماری پارٹی متحد ہے ۔ چوہدری نثار سے متعلق سوال کے جواب میں خواجہ آصف نے کہاکہ میں ان کے بارے میں کوئی بات نہیں کروں گا ، میرے کافی عرصے سے ان سے تعلقات نہیں ہیں اس لئے میرا حق نہیں بنتا کہ ان کے بارے میں کوئی بات کروں ، اس وقت اہم یہ ہے کہ جو بھی الیکشن میں مسلم لیگ (ن) کا نشان لیکر جائے گا اور ان کیساتھ وفاداری نبھائے گا وہ ہی سرخرو ہوگا اور عوام کی نظر میں بھی عزت پائے گا ۔ خواجہ آصف نے کہا کہ میاں نوازشریف ایم این اے تک نہیں بن سکتے مگر طوطی پھر بھی انہی کا بول رہا ہے ، پارٹی چھوڑنے والے بھی آزادحیثیت سے انتخاب میں حصہ لے رہے ہیں ۔ انہوں نے کہا کہ (ن) لیگ کا ہر کارکن نوازشریف کا وفادار ہے ، میاں شہبازشریف وزارت عظمیٰ کیلئے بہترین امیدوار ہیں ، ان کی کارکردگی بھی لاجواب ہے ، باقی حتمی فیصلہ پارٹی ہی کرے گی ، مریم نواز پارٹی کا مستقبل ہیں ان کو پبلک میں پذیرائی مل رہی ہے ، مریم نواز جو سیاست کر رہی ہیں وہ اس دور کی سیاست ہے ، میری اوقات نہیں کہ میں وزیراعلیٰ پنجاب کیلئے کسی نام کا تعین کروں ، میاں نوازشریف جس کو بھی نامزد کریں گے وہ سب سے بہترین امیدوار ہوگا ۔ انہوں نے کہا کہ 60کی دہائی میں یا 80کی دہائی میں فوج کا ساتھ اتنا برا نہیں سمجھا جاتا تھا ، میاں نوازشریف نے بھی تسلیم کیا کہ ماضی میں ہم سے بہت غلطیاں ہوئی ہیں جس میں آپ آئی جے آئی بنوانا ، فوج کی بالادستی کو تسلیم کرنا کہہ سکتے ہیں ، آج کل یہ باتیں نہیں چلتی ، مریم نواز موجودہ دور کی سیاست کر رہی ہیں ۔ وزیرخارجہ نے کہا کہ چیئرمین سینیٹ کیلئے جوڑ توڑ جاری ہے ، ہمارے اپنے اور اتحادی ووٹس ملا کر تقریباً49ووٹ بننتے ہیں ،ہمیں مزید 4ووٹوں کی ضرورت ہے جس کیلئے ہمیں کچھ لین دین کرنا پڑے گا ، پچھلے تین چار سال میں سیاست میں بہت تناؤ آیا ہے اسے کم کرنے کی کوشش کریں گے ، سیاست میں کوئی حرف آخر نہیں ہوتا ۔انہوں نے کہا کہ آئین سب سے اہم دستاویز ہے اور ہمیں پاکستان میں آئین کی حکمرانی کو یقینی بنانا ہے ۔