کوئٹہ (این این آئی)احتساب عدالت کوئٹہ نے نیب بلوچستان کے ریفرنس میں جعلی ہاؤسنگ اسکیم بنا کر لوگوں کو لوٹنے والے جعلساز سید محسن علی کو پانچ سال قید اور بیانوے لاکھ روپے جرمانہ کی سزا سنادی، شریک ملزم روحی محمد اچکزئی کو بھی3سال قیداور9لاکھ روپے جرمانہ کی سزادی گئی،
عدم ادائیگی کی صورت مزید سزا کاٹنی پڑے گی۔ ملزم سید محسن علی نے کوئٹہ کے علاقے بروری میں گلشن حسن ہاوسنگ اسکیم اور بلیلی کے علاقے میں پائن ٹاؤن کے نام سے ہاؤسنگ سکیمز شروع کیں جس میں عوام الناس سے پلاٹوں کی مد میں رقومات وصول کی گئی جبکہ قبضہ کسی کو نہیں دیاگیا۔متاثرین نے اس ضمن میں قومی احتساب بیورو بلوچستان سے رجوع کیا تو نیب نے ملزم کیخلاف تحقیقات مکمل کرکے ریفرنس احتساب عدالت میں دائر کر دیا۔احتساب عدالت کے جج مجید ناصر نے نیب پراسیکیوٹر راشد گولڑہ اور نیب کی تحقیقاتی ٹیم کی تحقیقات کی روشنی میں گلشن حسن ہاوسنگ اسکیم میں ملزم سید محسن علی کو پانچ سال سزا اور بیانویلاکھ روپے کے جرمانہ کی سزا جبکہ شریک ملزم روحی محمد اچکزئی کو 3سال قید اور9لاکھ روپے جرمانہ کی سزاسنادی ،واضح رہے احتساب عدالت کے جج مجید ناصر نے چند دن قبل پائن ہاوسنگ اسکیم میں بھی فیصلہ سناتے ہوئے ملزم سید محسن علی کو پانچ سال سزا اور 87,67,753/۔(ستاسی لاکھ ستاسٹھ ہزار سات سو تریپن) روپے کے جرمانہ کی سزاسنائی۔
