لاہور( این این آئی)سابق وزیر اعلیٰ پنجاب سردار دوست محمد کھوسہ نے کہا ہے کہ اگر ہماری طرف خاموشی ہے تو یہ کسی بڑے طوفا ن کا پیش خیمہ بھی ہو سکتی ہے ،سینیٹ انتخابات میں (ن) لیگ کی برتری عارضی ہے اور عام انتخابات کے نتائج بالکل اس کے برعکس ہوں گے، سردار ذوالفقار علی خان کھوسہ بیرون ملک ہے اور انکی آئندہ ہفتے ملک میں واپسی کے بعد مستقبل کی سر گرمیوں میں تیزی آئے گی۔ ’’ این این آئی ‘‘ سے خصوصی گفتگو کرتے ہوئے انہوں نے چوہدری نثار علی خان کے
کسی رابطے بارے سوال کے جواب میں کہا کہ سردار ذوالفقا ر علی خان بیرون ملک ہیں اور میرے خیال میں ایسا کوئی رابطہ نہیں ہوا ۔ بہر حال چوہدری نثار علی خان کے اپنے فیصلے ہیں ۔ ہمارے اپنے ساتھیوں سے مسلسل رابطے میں ہیں اور تمام فیصلے باہمی مشاورت سے ذوالفقار علی خان کھوسہ کی سرپرستی میں ہوں گے۔ انہوں نے بتایا کہ ذوالفقار علی خان کھوسہ کی آئندہ ہفتے واپسی ہے اور اس کے بعد مستقبل کی سر گرمیوں میں تیزی آئے گی اور جو بھی فیصلے ہوں گے وہ سیاست او رملک کی بہتری کیلئے ہوں گے۔
