اسلام آباد (مانیٹرنگ ڈیسک) جے یو آئی(ف ) کے سربراہ مولانا فضل الرحمن کی تصویر کیساتھ ایک نجی ٹی وی چینل نے براۂ راست پروگرام کے دوران ’’ مولانا ڈیزل ‘‘ کے الفاظ لکھ کر نشر کردئیے ،جس پر ٹی وی چینل کی انتظامیہ نے اپنی سنگین غلطی پر معذرت کرلی ہے ۔تفصیلات کے مطابق ہفتہ کو سینٹ انتخابات کے حوالے سے نشریات کے دوران ایک نجی ٹی وی چینل کی جانب سے تجزیہ کاروں کا نقطہ نظر لینے کیلئے براۂ راست پروگرام نشر کیا جارہا تھا اور
ساتھ ہی سکرین پر پارٹی پوزیشن اور سیاسی جماعتوں کے سربراہان کی تصاویر بھی چلائی جارہی تھیں تاہم مولانا فضل الرحمن کی تصویر کے ساتھ توہین آمیز ’’ مولانا ڈیزل ‘‘ کے الفاظ لکھ دئیے جو براۂ راست نشر ہوگیا اور ناظرین نے دیکھا۔بعدازاں ٹی وی چینل کی انتظامیہ نے اپنی غلطی کو تسلیم کرتے ہوئے خبرنامہ میں معذرت بھی کرلی ۔واضح رہے پی ٹی آئی کے سربراہ عمران خان اپنے جلسوں میں مولانا فضل الرحمن کو اسی طرح کے الفاظ سے مخاطب کرتے رہے ہیں۔
