اسلام آباد (این این آئی) ایم کیو ایم پاکستان کے دونوں دھڑوں میں معاملات طے پانے کے بعد سینیٹ انتخابات کیلئے متفقہ امیدواروں کے ناموں کا اعلان کردیا گیا ہے۔جمعہ کو اسلام آباد میں خالد مقبول صدیقی کے ہمراہ پریس کانفرنس کرتے ہوئے ایم کیو ایم پاکستان کے سربراہ ڈاکٹر فاروق ستار نے کہا کہ گزشتہ چند ہفتوں سے ہمارے درمیان اختلاف رائے کی وجہ سے عجیب صورتحال بنی ہوئی تھی لیکن ہم ایک دوسرے سے رابطے میں تھے اور مذاکرات چل رہے تھے، اس حوالے سے دونوں جانب سے ساتھیوں نے مثبت کردار ادا کیا

جبکہ گزشتہ روز ہی سینیٹ الیکشن کے حوالے سے ہمارے درمیان ایک اتفاق رائے ہوا ہے اور ہمیں یقین ہے کہ یہ سلسلہ آگے بھی چلتا رہے گا اور ہم ساتھ چلیں گے، کیوں کہ ہم نہیں چاہتے کہ ایم کیو ایم پاکستان کا ووٹ تقسیم ہو۔فاروق ستار نے کہا کہ (آج) ہونیوالے سینیٹ انتخابات کیلئے ہمارے 5 امیدوار ہوں گے اور ہمارے درمیان جن ناموں پر اتفاق ہوا ہے ان میں جنرل سیٹیوں پر بیرسٹر فروغ نسیم اور کامران ٹیسوری انتخاب لڑیں گے جب کہ ٹیکنوکریٹ کی سیٹ کے لیے عبدالقادر خانزادہ کے نام پر اتفاق ہوا ہے اور خواتین کی نشست کے لیے ڈاکٹر نگہت شکیل، اقلیتوں کی سیٹ پر سنجے پروانی کے نام پر اتفاق ہوا ہے۔فاروق ستار نے کہا کہ ہم نہیں چاہتے کہ ایم کیو ایم پاکستان کا ووٹ بینک تقسیم ہو اور ہماری کوشش ہے کہ ہم جڑ کر رہیں۔ انہوں نے کہا کہ ہمیں یقین ہے کہ ہم اگلے مرحلے میں رابطہ کمیٹی کا معاملہ بھی طے کر لیں گے۔اس موقع پر بات کرتے ہوئے ایم کیو ایم پاکستان (بہادرآباد) کے کنوینر خالد مقبول صدیقی نے کہا کہ ہمارا اصولی مؤقف ہے کہ ہماری جانب سے سینیٹ انتخابات کیلئے جنرل نشست پر بیرسٹر فروغ نسیم جبکہ فاروق ستار کے امیدوار کامران ٹیسوری ہوں گے۔انہوں نے کہا کہ بات چیت کا آغاز ہو گیا ہے اور دیگر معاملات بھی جلد طے پا جائیں گے۔