اسلام آباد (مانیٹرنگ ڈیسک)قصور میں جنسی درندگی کی بھینٹ چڑھ جانے والی زینب کی رسم چہلم ، ہزاروں افراد کی شرکت، خصوصی خطاب کے موقع پر ہر آنکھ اشکبار، رقت آمیز مناظر۔ تفصیلات کے مطابق قصور میں جنسی درندگی کی بھینٹ چڑھ جانے والی 6سالہ زینب کی رسم چہلم آج اس کے آبائی علاقے قصور شہر میں واقع اس کی رہائش گاہ کورٹ روڈ میں ادا کی گئی۔ اس موقع پر ہزاروں افراد نے رسم چہلم میں شرکت کی۔ رسم چہلم کے موقع پر زینب
کے والد،بھائی، چچا اور دیگر اہل خانہ کے علاوہ قریبی عزیزوں اور رشتہ دار بھی موجود تھے۔ تقریب میں شرکت کیلئے دوسرے علاقوں سے بھی کثیر تعداد میں لوگ آئے ہوئے تھے۔ تقریب میں ایصال ثواب کیلئے فاتحہ خوانی اور دعائیں مانگی گئیں۔ اس موقع پر تحریک منہاج القرآن کے مرکزی ناظم قصور نے خطاب کیا۔ اس خصوصی خطاب کے دوران وہاں موجود ہر شخص آبدیدہ ہو گیا جبکہ خواتین کی طرف سے سسکیاں اور آہیں بھی سنائی دیتی رہیں۔
