کراچی(این این آئی) کراچی کے علاقے ڈیفنس زمزمہ میں نامعلوم افراد کی کار پر فائرنگ سے چینی شہری ہلاک جبکہ 2افراد زخمی ہوگئے ۔تفصیلات کے مطابق کراچی کے علاقے زم زمہ میں سفید رنگ کی کارنمبرBC-526پر نامعلوم مسلح ملزمان نے فائرنگ کردی
جس کے نتیجے میں 2 چینی باشندوں سمیت 3 افراد زخمی ہوئے، جنہیں طبی امداد کے لیے اسپتال منتقل کیا گیا تاہم چینی باشندہ چینزو زخموں کی تاب نہ لاتے ہوئے چل بسا ۔ واقعے میں زخمی ہونے والے تینوں افراد شپنگ کمپنی کے ملازم ہیں، چینی شہریوں کو سیکیورٹی دی گئی تھی لیکن واقعے کے وقت وہ بغیر سیکیورٹی سفر کررہے تھے۔ شواہد کی روشنی میں شبہ ہے کہ چینیوں کو ٹارگٹ کیا گیا ہے کیونکہ جائے وقوعہ سے 9 ایم ایم پستول کے 9 خول ملے ہیں۔زخمی حسن عباس کی ٹانگ میں گولی لگی ہے۔علاقہ پولیس کے مطابق ہلاک ہونے والے غیرملکی باشندے کے ساتھ گاڑی میں ایک اور شخص موجود تھا،جو فائرنگ کے بعد گاڑی سے اتر کر بھاگ گیا۔پولیس کے مطابق غیرملکی جس گاڑی میں سوار تھا اسے نامعلوم ملزمان نے اپنی گاڑی سے ٹکر ماری، ٹکر مارتے ہی ملزمان نے غیر ملکی کی گاڑی پر فائرنگ کر دی۔پولیس کا کہنا ہے کہ واقعہ ممکنہ طور پر ٹارگٹ کلنگ کی کوشش لگتا ہے، جبکہ فائرنگ کی جگہ سے نائن ایم ایم پستول کے 9خول ملے ہیں۔پولیس نے واقعے کی تحقیقات شروع کردی ہے اور ابتدائی رپورٹ تیار کرلی ہے۔
