ایبٹ آباد(این این آئی)خیبر پختونخوا کے وزیر مشتاق غنی کے بھائی کی 11 سالہ ملازمہ کی پراسرار موت کی تحقیقات کیلئے جوڈیشل مجسٹریٹ کی موجودگی میں قبر کشائی کی گئی۔ایبٹ آباد کے نولکھی گاؤں میں مجسٹریٹ درجہ اول اعجاز الرحمان کی موجودگی میں مصباح نامی گھریلو ملازمہ کی قبر کشائی کے بعد جسم کے نمونے حاصل کیے گئے۔خیال رہے کہ صوبائی وزیر مشتاق غنی کے بھائی شعیب غنی

کے گھر کام کرنے والی 11 سالہ ملازمہ مصباح پراسرار طور پر 27 جنوری کو ہلاک ہوئی تھی جس کی بعدازاں تدفین کی گئی۔متوفیہ کی قبر کشائی کے بعد تحقیقاتی ٹیم نے جسم کے نمونے حاصل کرلئے جنہیں پنجاب فورنزک لیب روانہ کیا جائیگا۔دوسری جانب چیف جسٹس آف پاکستان جسٹس میاں ثاقب نثار نے بھی 11 سالہ ملازمہ کی پراسرار موت کا نوٹس لیتے ہوئے آئی جی خیبرپختونخوا سے تین روز میں رپورٹ طلب کر رکھی ہے۔