اسلام آباد(این این آئی)مسلم لیگ (ن) کے رہنما طلال چودھری نے نہال ہاشمی کی نااہلی پر ردعمل ظاہر کرتے ہوئے کہا ہے کہ خدارا ایسے فیصلے کریں جس سے خوف کے بجائے عزت بڑھے۔جمعرات کو میڈیا سے گفتگو کرتے ہوئے (ن) لیگ کےرہنما طلال چودھری نے کہا کہ کالے کوٹ والے کس طرح عدالتوں پر حملہ کرتے اور دروازے توڑتے ہیں ٗاس پر تو کوئی کارروائی نہیں ہوتی، توہین عدالت کے اتنے سارے کیسز ہیں، جب کوئی معافی مانگ لیتا ہے تو عدالت معاف کردیتی ہے، تو کیا سارے فیصلے (ن)

لیگ والوں کے خلاف ہی ہوں گے۔طلال چودھری نے کہا کہ نواز شریف کی نااہلی کا فیصلہ کروژوں لوگ نہیں مان رہے، مخالفین چاہتے ہیں پوری (ن) لیگ کو سزا ہوجائے اور نااہل کر دیا جائے، نہال ہاشمی کے بیان پر(ن) لیگ نے ضابطے کی کارروائی بھی کی تھی، ہمیں کوئی اعتراض نہیں اگرسب کیلئے ایک اجیسا اصول اپنا لیا جائے، خدارا ایسے فیصلے کریں جس سے خوف کے بجائے عزت بڑھے۔واضح رہے کہ سپریم کورٹ نے مسلم لیگ (ن) کے رہنما اورسینیٹر نہال ہاشمی کو توہین عدالت کا جرم ثابت ہونے پر5 سال کیلئے نااہل قرار دیتے ہوئے ایک ماہ قید اور50 ہزار روپے جرمانے کی سزا سنا دی ۔