لاہور ( این این آئی) بچوں سے زیادتی اور پورنو گرافی کے ملزموں کو سر عام پھانسی پر لٹکانے ،قوانین میں تبدیلی کیلئے لاہورہائیکورٹ میں درخواست دائرکردی گئی۔ بیرسٹر سید محمد جاوید اقبال جعفری کی جانب سے دائر درخواست میں کہا گیا ہے کہ بچوں سے زیادتی کے ملزموں کے مکروہ عمل سے معاشرے میں انتشار پھیلا، زیادتی اور پورنو گرافی میں سزاء یافتہ مجرموں کو سرعام پھانسی نہ ہونے سے معصوم بچوں سے زیادتی کے واقعات میں آئے
روزاضافہ ہو رہا ہے ۔بچوں سے زیادتی فسادفی الارض کے زمرے میں آتا ہے،نرم قوانین کی وجہ سے زیادتی کے مجرموں کو جیل میں پھانسی پر لٹکایا جاتا ہے،خفیہ طریقے سے دی جانی والی سزائیں دیگر ملزمان کیلئے سبق آموز نہیں بنتیں۔ لہٰذا معزز عدالت سے استدعا ہے کہ آئین کے آرٹیکل دو اے، تین اورقانون شہادت کے تحت زیادتی کے مجرموں کو سرعام پھانسی پر لٹکانے کا حکم دیا جائے اور عدالت اس حوالے سے قوانین میں تبدیلی کا حکم دے۔
