لاہور( این این آئی) وزیر اعلیٰ پنجاب محمد شہباز شریف کی پیر سیالوی سے ملاقات رنگ لے آئی ،ختم نبوت کے معاملے پر مستعفی ہونے والے مسلم لیگ (ن) کے چار اراکین پنجاب اسمبلی نے استعفے واپس لے لیے۔تفصیلات کے مطابق ڈیڑھ ماہ قبل ختم نبوت کے معاملے پر مسلم لیگ (ن) کے 4ممبران پنجاب اسمبلی نے استعفے دے دیئے تھے جن میں پیر حمید الدین سیالوی کے بیٹے نظام الدین سیالوی بھی شامل تھے۔پیر حمید الدین سیالوی نے حکومت کے خلاف احتجاجی
تحریک چلانے کا بھی اعلان کیا تھاجو انہوں نے وزیر اعلیٰ پنجاب شہبازشریف سے ملاقات کے بعد واپس لے لیا۔اب مسلم لیگ (ن) کے چاروں ممبران اسمبلی نے اپنے استعفے واپس لے لیے ہیں۔جن میں نظام الدین سیالوی، مولانا رحمت اللہ، رضا نصر اللہ اور محمد خان بلوچ شامل ہیں۔چاروں اراکین کا کہنا ہے کہ شہبازشریف نے ختم نبوت کے معاملے پر ان کے تحفظات دور کرنے کی یقین دہانی کرائی تھی اور اب ان کے تحفظات دور کردیئے گئے ہیں جس کے بعد استعفے واپس لیے۔
