اسلام آباد(مانیٹرنگ ڈیسک)معصوم بچیوں کا قاتل یہ شخص میرا بیٹا نہیں ہو سکتا، زینب کے والداور اہل محلہ نے قاتل کو سر عام پھانسی دینے کا مطالبہ کر دیا۔ تفصیلات کے مطابق زینب کے قاتل عمران کی والدہ کا سارے معاملے پر بیان سامنے آیا ہے جس میں انہوں نے قاتل عمران کو بیٹا تسلیم کرنے سے انکار کرتےہوئے کہا ہے کہ معصوم بچیوں کو درندگی کا نشانہ بنانے والا ان کا بیٹا نہیں ہو سکتا۔ خیال رہے کہ قاتل عمران کی والدہ نے اس کی گرفتاری میں بھی پولیس کو مدد فراہم کی تھی۔
محلہ داروں کا کہنا ہے کہ قاتل عمران اکثر بچوں کو چیزیں دکھا کر لبھانے کی کوشش کرتا تھا جبکہ اس کی چھوٹی موٹی وارداتوں سے متعلق ہمیں پہلے سے ہی علم تھا۔ دوسری جانب زینب کے والد اور اہل محلہ نے زینب کے قاتل عمران کو سر عام پھانسی دینے کا مطالبہ کیا ہے۔ زینب کے قتل پر پرنٹ، الیکٹرانک اور سوشل میڈیا کے ذریعے پاکستان بھر کے شہریوں نے بھی زینب کے اہل خانہ اور محلہ داروں کی طرح قاتل کو سر عام پھانسی دینے کا مطالبہ کیا ہے۔
