اسلام آباد(مانیٹرنگ ڈیسک)آپ کے اگر کوئی مطالبات ہیں تو ہمیں بعد میں بتائیں، یہاں ذکر نہ کرنا، مائیکس آن رہ گئے، رانا ثنا اللہ زینب کے والد حاجی امین کو بولنے سے منع کرتے رہے، زینب کے والد نے جیسے ہی ایم آئی ، آئی ایس آئی کی تفتیشی ٹیموں کا شکریہ ادا کرتے ہوئے آرمی چیف اور چیف جسٹس کا نام لیا شہباز شریف نے مائیک ہی بند کر دیا۔ تفصیلات کے مطابق نجی ٹی وی بول نیوز
نے گزشتہ روز شہباز شریف کی پریس کانفرنس کے دوران صوبائی وزیر قانون رانا ثنا ننھی مقتولہ زینب کے والد حاجی امین کو دبائو میں لانے اور خاموش رہنے کی تلقین کرتے فوٹیج چلا دی۔ ٹی وی کیمروں کے سامنے پڑے مائیک اور ڈائس مائیک آن ہونے کی وجہ سے آواز کیمروں میں نہ صرف محفوظ ہوتی رہی بلکہ وہاں موجود افراد بھی سنتے رہے۔ زینب کے والد اس موقع پر کچھ مطالبات حکومت کے سامنے رکھنا چاہتے تھے جس کا انہوں نے رانا ثنا سے ذکر کیا جس پر رانا ثنا نے فوری طور پر انہیں منع کرتے ہوئے کہا کہ آپ مجرم کی سزا کے حوالے سے یہاں بات کریں اگر کوئی اور بات کرنی ہے تو ہم سے بعد میں اکیلے میں کریں ، ہم آپ کے مطالبات پورے کریں گے مگر یہاں بات نہ کریں۔ پریس کانفرنس کے دوران جیسے ہی زینب کے والد حاجی امین نے آرمی چیف ، چیف جسٹس اور ایم آئی ، آئی ایس آئی تفتیشی ٹیموں کا شکریہ ادا کیا تو شہباز شریف نے فوری طور پر ان کا مائیک خود ہی بند کر دیا۔ اس بات کا گلہ کرتے ہوئے حاجی امین کا بھی کہنا تھا کہ میں نے ابھی بات کرنا تھی کہ شہباز شریف نے میرا مائیک بند کر دیا۔واضح رہے کہ گزشتہ روز پنجاب حکومت نے زینب کے قاتل کو گرفتار کرنے کا دعویٰ کیا تھا جس کے بعد شہباز شریف نے اپنی پریس کانفرنس میں اس کی تصدیق کرتے ہوئے زینب کے قاتل عمران جو کہ اس کا پڑوسی تھا کی گرفتاری پر جے آئی ٹی کو شاباش دی تھی۔
