اسلام آباد (آئی این پی ) پاکستان میں ایران کے مہدی ہنردوست نے کہا ہے کہ مسلم دنیا اس وقت ایک چیلنج سے گزررہی ہے اور پاکستان اس سلسلے میں مثبت اور تعمیری کردار ادا کر سکتا ہے ۔انہوں نے خطے میں پاکستان کے متوازن کردار کی تعریف کی اور کہا کہ سی پیک ایک گیم چینجر منصوبہ ہے جسے دنیا کے ممالک کو فائدہ پہنچے گا، اس منصوبے کے ذریعے پاکستانی گوادر بندرگاہ کو چینی صوبے سنکیانگ سے ملادیا جائے گا ۔
ان خیالات کا اظہار انہوں نے پاکستان کے قومی سلامتی کے مشیر ناصر خان جنجوعہ سے بات چیت کرتے ہوئے کیا ۔ناصر خان جنجوعہ نے اس موقع پر کہا کہ سرحدوں پرموجود مسائل میں مفاہمت کے ساتھ دونوں ممالک اپنے تعلقات کو مزید فروغ دے سکتے ہیں ،دونوں رہنمائوں نے دوطرفہ تعلقات کا جائزہ لیتے ہوئے سی پیک پر معاشی
پس منظر میں بات چیت کی ۔یادرہے کہ چند ماہ قبل اقوام متحدہ جنرل اسمبلی کے اجلاس میں ایرانی صدر حسن روحانی نے پاکستان کے سابق وزیر اعظم میاں محمد نواز شریف سے بات چیت کے دوران سی پیک میں شمولیت کی خواہش کا بھی اظہار کیا تھا ، سی پیک کے تحت پاکستان بھرمیں بنیادی ڈھانچے کے منصوبے زیر تعمیر ہیں جن کی مالیت اب 62ارب ڈالر تک پہنچ چکی ہے ۔
