کراچی(مانیٹرنگ ڈیسک) کراچی کے حلقے این اے 251 سے منتخب ایم کیو ایم پاکستان کے ممبر قومی اسمبلی سید علی رضا عابدی نے قومی اسمبلی کی نشست سے اپنااستعفیٰ اسپیکر ایاز صادق کو بھیج دیا ہے، علی رضا عابدی نے کہا ہے کہ سیاسی اور ذاتی وجوہات کی بنا پر قومی اسمبلی کی رکنیت چھوڑ رہاہوں ۔علی رضا عابدی نے کہاکہ پاک سرزمین پارٹی کے ساتھ کسی قسم کے انتخابی الائنس کا حصہ نہیں بن سکتا،اسمبلی رکنیت سے استعفے کی وجہ بتاتے ہوئے علی رضا عابدی نے کہاکہ کراچی

میں اپنے حلقے کے عوام کے لیے کچھ نہیں کرسکا، چار سال سے جاری آپریشن، مداخلت اور اس کے نتائج استعفے کی وجہ ہیں۔علی رضاعابدی نے سماجی رابطے کی ویب سائٹ ٹوئٹر پر استعفے کی کاپی جاری کردی، جس میں علی رضا عابدی نے کہاکہ سیاسی اور ذاتی وجوہات پر مستعفی ہورہا ہوں لیکن سب ہی واقف ہیں کہ معاملہ اتنا سادہ خوشبو نہیں۔دوسری جانب اسپیکر قومی اسمبلی سردار ایاز صادق نے استعفے کی تصدیق کے لئے علی رضا عابدی کو بدھ کو چار بجے طلب کرلیا ہے ۔