اسلام آباد (مانیٹرنگ ڈیسک) وزیر مملکت برائے اطلاعات و نشریات مریم اور نگزیب نے سابق وزیر اعظم محمد نوازشریف کو سکیورٹی دینے پر عمران خان کی جانب سے تنقید مسترد کرتے ہوئے کہا ہے کہ نوازشریف نے پہلی بار دہشتگردی کے خلاف جنگ لڑی عمران خان طالبان کا حصہ ہیں پروٹوکول اور سکیورٹی کے درمیان فرق نہیں سمجھ سکتے تمام اداروں کو آئین اور قانون کے مطابق کام کرنا ہوگا۔ جمعرات کو میڈیا سے
بات چیت کرتے ہوئے مریم اور نگزیب نے کہا کہ سی پیک دینے والے، دہشتگردی کا خاتمہ کرنیوالے کو ملک سے بھاگنے کی ضرورت نہیں۔ وزیرمملکت نے کہا کہ جس وزیراعظم نے ملک کو اندھیروں سے نکالا، اسے احتساب سے ڈرنے کی ضرورت نہیں انہوں نے کہاکہ عمران خان اداروں کو گالیاں دیتے ہیں، بھاگنے کی ضرورت انہیں ہے۔ وزیر مملکت نے کہاکہ جس نے دہشتگردی کا مقابلہ کیا ہو اسے سیکورٹی کی ضرورت ہوتی ہے۔انہوں نے کہاکہ محمد نواز شریف جس طرح قانون کے سامنے پیش ہورہے ہیں وہ صرف عوام کیلئے ہے۔ مریم اورنگزیب نے کہاکہ محمد نوازشریف ووٹر اور ووٹ کے تقدس کو بحال کرنا چاہتے ہیں۔مریم اورنگزیب نے کہا کہ ہمارا موقف ہے کہ ملک کی ترقی اور خدمت صرف منتخب لوگ ہی کر سکتے ہیں انہوں نے کہاکہ عوام نے محمد نواز شریف کو تیسری مرتبہ وزیراعظم منتخب کیا۔مریم اورنگزیب نے کہا کہ پاکستان کے تیسری مرتبہ منتخب وزیراعظم کے خلاف کوئی ثبوت نہیں مل سکا انہوں نے کہاکہ نواز شریف کے خلاف ایک بھی ثبوت سامنے نہیں لایا جا سکا۔وزیر مملکت نے کہا کہ ثبوت نہ ملنے پر محمد نواز شریف کو اقامہ کی بنیاد پر نااہل کیا گیا۔مریم اورنگزیب نے کہا کہ پاکستان کی عوام محمد نوازشریف اور آئین کے ساتھ ہے۔مریم اورنگزیب نے کہاکہ ملک کے تمام اداروں کو آئین اور قانون کے تحت کام کرنا ہو گا۔
انہوں نے کہاکہ عمران خان پروٹوکول اور سیکورٹی کے درمیان فرق نہیں سمجھ سکتے ?اس لئے سیکورٹی دی کہ محمد نوازشریف نے پاکستان میں پہلی دفعہ دہشتگردی کیخلاف جنگ لڑی ہے اور آپ نہیں سمجھیں گے کیونکہ آپ تو طالبان کا حصہ ہیں اور ان کی حمایت کرتے ہیں انہوں نے کہاکہ نیا دور کا آغاز ہو چکا ہے جہاں ہر ادارے کو آئین کے اور قانون کے دائرے میں رہ کر کام کرنا ہو گاجس طرح ملک کا منتخب وزیر اعظم آئین اور قانون کے آگے جھوٹے الزامات ہونے کے باوجود پیش ہو رہا ہے اسی طرح تمام اداروں کو آئین اور قانون کی پاسداری کرنی ہوگی۔
