ملتان(آئی این پی) تحریک انصاف نے جنوبی پنجاب میں بھرپورسیاسی طاقت کا مظاہرہ کرنے کا فیصلہ کرلیا،چئیرمین تحریک انصاف عمران خان نے جنوبی پنجاب میں 2نومبر سے 3دسمبرتک 6جلسوں کی منظوری دے دی۔جلسوں میں عمران خان ،شاہ محمودقریشی ،جہانگیرترین سمیت تحریک انصاف کی مرکزی قیادت شریک ہوگی جبکہ اس موقع پرجنوبی پنجاب کی بعض سیاسی شخصیات کی تحریک انصاف میں بھی شمولیت متوقع ہے۔تحریک انصاف نے جنوبی پنجاب میں جلسوں کا شیڈول بھی جاری کردیا ہے جس کے مطابق چئیرمین

تحریک انصاف عمران خان 2نومبرکو احمدپورشرقیہ(بہاولپور)میں جلسہ سے خطاب کریں گے جبکہ 3نومبرکو کوٹ ادو(مظفرگڑھ)،4نومبر کو خانیوال،11نومبرکو تونسہ شریف،2دسمبرکو لیہ اور 3دسمبر کو بہاولنگرمیں جلسہ سے خطاب کریں گے۔تحریک انصاف جنوبی پنجاب کی قیادت نے عمران خان کے جلسوں کی تیاریوں وانتظامات کو حتمی شکل دے دی ہے،پارٹی ذرائع کا کہنا ہے کہ تحریک انصاف کے جنوبی پنجاب میں منعقدہ جلسوں میں بعض سیاسی شخصیات بھی باقاعدہ طور پرتحریک انصاف میں شمولیت کا اعلان کریں گی۔

موضوعات:عمران خان