اسلام آباد (مانیٹرنگ ڈیسک )سابق وزیراعظم نواز شریف کا اپنے خلاف نیب ریفرنسز سپریم کورٹ میں چیلنج کرنے کا فیصلہ۔ میڈیا رپورٹس کے مطابق سابق وزیراعظم نواز شریف کی جانب سے اپنے خلاف تینوں نیب ریفرنسز کے خلاف سپریم کورٹ میں آئینی درخواست دائر کرنے کا فیصلہ کر لیا گیا ہے اور یہ آئینی درخواست آج دائر کئے جانے کا امکان ظاہر کیا جا رہا ہے۔
نواز شریف کی جانب سے دائر کی جانے والی مجوزہ درخواست میں عدالت سے استدعا کی جائے گی کہ نیب کو تین ریفرنس ایک ریفرنس میں بدلنے کا حکم دیا جائے کیونکہ قانون کے مطابق اثاثے جتنے بھی ہوں ریفرنس ایک ہی فائل کیا جاتا ہے۔ خیال رہے کہ نیب نے احتساب عدالت میں نواز شریف کے خلاف عزیزیہ سٹیل ملز، ہل میٹل اور فلیگ شپ انویسٹمنٹ کے تین ریفرنس دائر کئے ہوئے ہیں۔
