اسلام آباد (مانیٹرنگ ڈیسک) مریم نواز اور کیپٹن (ر)صفدرکی احتساب عدالت میں پیشی، وکلا اور لیگی کارکنوں کے درمیان ہنگامہ آرائی، عدالتی کارروائی شروع ہونے سے پہلے ہی ختم، سماعت 19اکتوبر تک ملتوی،اگلی سماعت پر نواز شریف ، مریم نواز اور ان کے شوہر کیپٹن (ر)صفدر پر فرد جرم عائد کی جائے گی۔ تفصیلات کے مطابق سابق وزیراعظم نواز شریف ،

ان کے بچوں اور داماد کے خلاف تین نیب ریفرنسز کی سماعت اسلام آباد کی احتساب عدالت میں ہوئی ۔ مریم نواز اور کیپٹن صفدر اپنے سمدھی چوہدری منیر کے گھر سے احتساب عدالت پہنچے ۔ اس موقع پر سکیورٹی کے انتہائی سخت انتظامات کیے گئے تھے اور احتساب عدالت کے اندر اور باہر 1100 کے قریب ایف سی اور پولیس کے جوان تعینات کیے گئےتھے جبکہ عدالت کے اردگرد خاردارتار بھی لگائی گئی تھی ۔ مریم نواز اور کیپٹن(ر)صفدر کی احتساب عدالت میں پیشی کے موقع پر لیگی کارکنان اور وکلا کے درمیان ہنگامہ آرائی اور دھکم پیل ہوئی جس پر وہاں تعینات پولیس اہلکاروں کو لاٹھی چارج کرنا پڑ گیا جسے کے نتیجے میں متعدد افراد زخمی ہو گئے ۔ سماعت شروع ہونے پر وکلا نے کمراہ عدالت میں شدید ہنگامہ آرائی شروع کر دی اور احتساب عدالت کے جج محمد بشیر سے پولیس روئیے کی شکایت کی جس پر جج محمد بشیر نے وکلا سے شکایت کی تحریری درخواست طلب کی جس پر وکلا نے عدالت میں ہلڑ بازی شروع کر دی۔ وکلا کی ہلڑ بازی کے باعث احتساب عدالت کے جج محمد بشیر سماعت چھوڑ کر اپنے چیمبر میں چلے گئے اور ان کے چیمبر میں جانے کے کچھ دیر بعد عدالت کے ریڈر نے سماعت 19اکتوبر کو ہونے کا اعلان کر دیا۔واضح رہے کہ آج احتساب عدالت کی جانب سےسابق وزیراعظم نواز شریف اور ان کی صاحبزادی مریم نواز اورداماد کیپٹن (ر)صفدر پرفرد جرم عائد کی جانی تھی ۔

موضوعات:احتساب عدالت فرد جرم کیپٹن صفدر لیگی کارکن مریم نواز وکلا