اسلام آباد (مانیٹرنگ ڈیسک)تحریک انصاف کی منحرف رکن عائشہ گلالئی کے وکیل نے کمیشن کو آگاہ کیا ہے کہ عائشہ گلالئی بطور پی ٹی آئی ممبر اسمبلی اپنا کام جاری رکھے گی۔ منگل کو چیف الیکشن کمشنر جسٹس (ر) سردار محمد رضا کی سربراہی میں بنچ نے عائشہ گلالئی کے خلاف عمران خان کی طرف سے نااہلی کے ریفرنس کی سماعت کی۔ اس دوران پی ٹی آئی کے وکیل نے کمیشن کو بتایا کہ عائشہ گلالئی نے وزیراعظم کے
انتخاب میں پارٹی پالیسی سے انحراف کیا اور انہوں نے پارٹی کے کہنے پر پارٹی کے نامزد امیدوار کو ووٹ نہیں دیا جبکہ عائشہ گلالئی کے وکیل نے اس موقع پر مؤقف اختیار کیا کہ عمران خان کے وکیل یہ بتائیں کہ عمران خان نے خود وزارت عظمیٰ کیلئے ووٹ ڈالا تھا۔ عائشہ گلالئی بطور ممبر اسمبلی پی ٹی آئی کے پلیٹ فارم سے اپنا کام جاری رکھیں گی۔ کمیشن نے سماعت آج تک کیلئے ملتوی کر دی۔
