لاہور(مانیٹرنگ ڈیسک)کسٹمز انٹیلی جنس نے لاکھوں روپے مالیت کی بھارتی مونگ پھلی، سمگل شدہ الائیرم اور گارمنٹس سے لدے 2 مزدے قبضہ میں لے کر تحقیقات شروع کر دیں۔بتایا گیا ہے کہ کشمیر کے شہروں کیلئے آنے والی انڈین مصنوعات سمگل ہو کر لاہور سمیت پاکستان کے دوسرے شہروں میں پہنچنے کا رجحان بڑھ گیا ہے۔ انڈین ٹماٹر کی بھاری کھیپ کے بعد کسٹمز انٹیلی جنس نے کشمیر ٹریڈ کے نام پر انڈیا سے منگوائی گئی

مونگ پھلی سے لدہ مزدہ پکڑ لیا ہے۔ ایل ای ایس تھری نائن سیون ٹو نمبر مزدہ سمگل شدہ انڈین مونگ پھلی کے تین سو چھپن بیگز لے کر لاہور کے راستے اوکاڑہ جا رہا تھا۔کسٹمز حکام کے مطابق کالا شاہ کاکو سے تحویل میں لئے گئے مزدہ سے برآمد ہونے والی 7 ہزار 120 کلوگرام انڈین مونگ پھلی آنند انڈسٹریز کے بیگز میں پیک تھی۔ ایل ای ایس تھری نائن سیون ٹو نمبر مزدہ میں انڈین مونگ پھلی راولپنڈی سے بھیجی گئی۔ کسٹمزانٹیلی جنس حکام کے مطابق مونگ پھلی کی مالیت بیالیس لاکھ روپے سے زائد ہے جبکہ کسٹمز ڈیوٹی کی مد میں سولہ لاکھ روپے واجب الادا تھے۔کسٹمز انٹیلی جنس نے الائے رمز اور جرسی سویٹر کی بھاری کھیپ لے کر راولپنڈی سے آنے والا مزدہ بھی کالا شاہ کاکو کے قریب روک کر تحویل میں لے لیا۔ مزدے میں چینی ساختہ گارمنٹس اور الائے رم انارکلی مارکیٹ لائے جا رہے تھے۔کسٹمز انٹیلی جنس کی ٹیم میں ڈپٹی ڈائریکٹر عثمان طارق، سپرنٹنڈنٹ سلیم اللہ خان، انٹیلی جنس آفیسر ذوالفقار ڈوگر، ندیم احسن اور سہیل مرتضی شامل تھے۔ کسٹمز انٹیلی جنس نے لاکھوں روپے مالیت کی بھارتی مونگ پھلی، سمگل شدہ الائیرم اور گارمنٹس سے لدے 2 مزدے قبضہ میں لے کر تحقیقات شروع کر دیں