اسلام آباد (مانیٹرنگ ڈیسک)پاکستان تحریک انصاف نے پاکستان سرزمین پر امریکا کو مشترکہ آپریشن کی پیشکش پر جواب مانگ لیا۔ منگل کو ڈپٹی اسپیکر مرتضیٰ جاوید عباسی کی سربراہی میں قومی اسمبلی کے اجلاس کے دوران تحریک انصاف کی جانب سے وزیر خارجہ خواجہ آصف کے حالیہ بیان پر شدید احتجاج کیا گیا۔تحریک انصاف کی رکن اسمبلی شیریں مزاری نے اظہار خیال کرتے ہوئے کہا کہ حقانی نیٹ ورک کے خلاف مشترکہ آپریشن کی پیشکش پر وزیر خارجہ ایوان میں وضاحت دیں۔
شیریں مزاری نے کہا کہ امریکا کی پارٹنرشپ بھارت کے ساتھ ہے اور وزیر خارجہ خواجہ آصف نے پاکستانی سرزمین پر امریکا کو مشترکہ آپریشن کی پیشکش کیسے کردی۔ وزیر خارجہ خواجہ آصف کو اپنے بیان پر وضاحت پیش کرنا ہوگی۔اس موقع پر ڈپٹی اسپیکر مرتضیٰ جاوید عباسی نے وزیر خارجہ سے جواب مانگنے کے لئے پارلیمانی امور کے وزیر شیخ آفتاب کی ڈیوٹی لگادی اور کہاکہ خواجہ آصف نے واضح کیا تھا کہ صرف الزام تراشی نہیں حقائق پر مبنی اطلاعات دی جائیں ہم خود کارروائی کریں گے۔
