پشاور(این این آئی)خیبرپختون خوا کے کالجز کے اساتذہ نے ہڑتال کرتے ہوئے بنی گالا میں عمران خان کی رہائش گاہ کے باہر دھرنے کی دھمکی دیدی۔خیبر پختونخوا کے تمام کالجز کے اساتذہ نے مطالبات کی منظوری کیلئے ہڑتال کا اعلان کرتے ہوئے تمام نصابی اور غیر نصابی سرگرمیاں معطل کردیں جس کے نتیجے میں طلبہ کا مستقبل خطرے میں پڑگیا۔ خیبر پختون خوا پروفیسرز اینڈ
لیکچررز ایسوسی ایشن ایکشن کمیٹی کا اجلاس گورنمنٹ کالج پشاورمیں منعقد ہوا جس میں تمام کالجز کے نمائندے شریک ہوئے۔اساتذہ نے مطالبات کی منظوری تک صوبہ بھر میں تمام نصابی اور غیر سرگرمیاں تعلیمی معطل کرنے کا فیصلہ کیا۔ چیئرمین ایکشن کمیٹی پروفیسر جمشید نے کہا کہ پاکستان تحریک انصاف کی صوبائی حکومت نے تمام کالج اساتذہ کے مسائل و مطالبات کو یکسر
نظر انداز کردیا ہے ٗآج سے صوبہ بھر تعلیمی سرگرمیاں معطل رہیں گی جبکہ مطالبات کی عدم منظوری کی صورت میں بنی گالہ اسلام آباد میں چیرمین پی ٹی آئی کی رہائش گاہ کے باہر دھرنا دیا جائیگا۔ چیرمین ایکشن کمیٹی جمشید خان نے تمام لوکل یونٹس کے صدور کو ایکشن کمیٹی کے فیصلوں کو قابل عمل بنانے کے لئے اقدامات کرنے کی ہدایت کی۔چیئرمین ایکشن کمیٹی جمشید خان نے کہاکہ حکومت جلد اساتذہ کے اپ گریڈیشن اور پروفیشنل الائونس کامسئلہ حل کرے ۔