اسلام آباد (مانیٹرنگ ڈیسک)احتساب عدالت میں رینجرز تعیناتی کی وجہ سے پیش آنے والے واقعہ کے بعد وزیراعظم اور جی ایچ کیو میں رابطہ ہوا، فریقین معاملے کو بڑا ایشو بننے سے روکنا چاہتے ہیں، کابینہ ارکان
کی بڑی تعداد بھی معاملے کو خوش اسلوبی سے حل کرنے کی خواہاں ہے، سینئر صحافی و تجزیہ کار حامدمیر کا نجی ٹی وی جیو نیوز کے پروگرام ’’آج شاہزیب خانزادہ کے ساتھ‘‘میں گفتگو۔ تفصیلات کے مطابق سینئر صحافی و تجزیہ کار حامد میر نے نجی ٹی وی جیو نیوز کے پروگرام ’’آج شاہزیب خانزادہ کے ساتھ‘‘میں گفتگو کرتے ہوئے انکشاف کیا ہے کہ نواز شریف کی پیشی کے موقع پر رینجرز کی تعیناتی کے باعث پیش آنے والے واقعہ کے بعد وزیراعظم اور جی ایچ کیو میں کئی بار رابطہ ہوا ہے جس میں ایسے واقعات دوبارہ نہ ہونے پر اتفاق کر لیا گیا ہے۔ فریقین کی کوشش ہے کہ اس معاملے کو بڑا ایشو نہ بنایا جائے جبکہ وزیراعظم سمیت وفاقی کابینہ ارکان کی بڑی تعداد ایسی صورتحال نہیں چاہتی جس سے حکومت کے خلاف یہ تاثر جائے کہ حکومت اس معاملہ کو ایشو بنا کر کسی ادارے کو نیچا دکھانا چاہتی ہےجبکہ آرمی چیف بھی چاہتے ہیں ایسے واقعات آئندہ نہ ہوں۔حامد میر کا کہنا تھا کہ سپیشل کور کمانڈر کانفرنس میں آرمی چیف کی گفتگو بہت حوصلہ افزا تھی انہوں نے اس بات کا اظہار کیا ہے کہ غلطیاں اپنی جگہ مگر حالات کو بہتر کی طرف لے جانے کی کوشش کی جانی ضروری ہے۔
