اسلام آباد(این این آئی)پاکستان تحریک انصاف کے چیئرمین عمران خان نے کہاہے کہ برمی مسلمانوں کے قتل عام پر اقوام متحدہ کی غیر فعالیت شرمناک ہے۔ایک بیان میں چیئرمین تحریک انصاف عمران خان نے اقوام متحدہ کے سیکرٹری جنرل کو خط لکھا ہے جس میں انہوں نے روہنگیا مسلمانوں کی حالت زاراوراقوام متحدہ کے کردار پر کڑی تنقید کرتے ہوئے کہا کہ روہنگیا مسلمانوں کی نسل کشی جاری ہے اور اقوام عالم خاموش تماشائی بنی ہوئی ہیں۔

اقوام متحدہ اس مقصد کو پورا کرے جس کے لئے اس کا قیام عمل میں لایا گیا، وقت آن پہنچا ہے کہ اقوام متحدہ اپنے وجود کا احساس دلائے، تاہم اقوام متحدہ کو فرائض کی انجام دہی میں ذلت آمیز ناکامی کا سامنا ہے۔ روانڈا قتل عام کے بعد امید تھی کہ اقوام متحدہ بلاتفریق ذمہ داریوں کا احساس کریگا لیکن برمی مسلمانوں کے قتل عام پر اقوام متحدہ کی غیر فعالیت شرمناک ہے، یہ وقت ہے کہ اقوام متحدہ یا تو واضح مدد کرے یا پھر اپنے منشور سے ہمیشہ کے لیے لاتعلق ہو جائے۔