اسلام آباد(مانیٹرنگ ڈیسک) پاکستان تحریک انصاف کے سربراہ نے پانامہ کیس میں نواز شریف کی نا اہلی کے بعد یوم تشکر منانے کا عزم کرتے ہوئے پریڈ گرائونڈ اسلام آباد میں جلسے کا اعلان کر دیا۔ تفصیلات کے مطابق عمران خان نے میڈیا سے گفتگو کرتے ہوئے کہا کرپٹ حکمران صرف قوم کے مجرم ہی نہیں بلکہ غدار بھی ہیں اور اب سب کرپٹ لوگوں کا احتساب ہوگا۔ یہ صرف شروعات ہیں اور معاملات آگے بڑھیں گے۔

نواز شریف کی نا اہلی سے حق اور سچ کی فتح ہوئی ہے۔ عدلیہ کا وقار بلند اور جمہوریت مضبوط ہوئی ہے۔ جمہوریت میں لیڈر جواب دہ ہوتا ہے اور اس سے پوچھ گچھ ہوتی ہے۔ عمران خان نے کہا کہ پانامہ کیس کا فیصلہ سامنے آنے اور نواز شریف کی نا اہلی کے فیصلے پر وہ اتوار 30 جولائی کو اسلام آباد پریڈ گرائونڈ میں جلسہ کریں گے اور یوم تشکر منائیں گےاور کارکنوں کو اگلا لائحہ عمل بتائیں گے۔