لاہور( این این آئی)بیٹی کی شادی کی شاپنگ کے سلسلہ میں جانے والے میاں بیوی بھی خود کش دھماکے کی زد میں آکر موت کے منہ میں چلے گئے ۔ والٹن کے رہائشی نیامت اور ان کی اہلیہ شہزادی بی بی اچھرہ بازار سے شاپنگ کرنے کیلئے گھر سے نکلے تھے۔ ان کے صاحبزادے عثمان نے بتایا کہ میں دکان سے گھر واپس آیا تو بہنوں نے پوچھا بھائی فیروز پور روڈ کہاں ہے جس پر میں نے سوال کیا وہاں کیا ہے ،
ان کے بار بار اصرار پر بتایا کہ جہاں امی اور ابو شاپنگ کرنے گئے ہیں وہ فیر وز پور روڈ ہی ہے اور اس کے ساتھ ہی انہوں نے چیخ و پکار شروع کر دی ۔ جب میں نے ٹی وی دیکھا تو خود کش دھماکے کی خبر چل رہی تھی جس پر میں نے اپنے کزن کو ساتھ لیا اور اپنے امی اور ابو کی تلاش میں نکلا ہی تھا کہ پولیس والے مجھے جناح ہسپتال لے گئے جہاں ڈیڈ ہاؤس میں دونوں کی لاشیں پڑی تھیں ۔ پہلے ابو مجھے دکان پر چھوڑ کر آتے اور لاتے تھے لیکن آج مجھے انہیں لانا پڑ گیا ہے ۔
