اسلام آباد (مانیٹرنگ ڈیسک ) آئندہ مالی سال کا چار ہزار آٹھ سو ارب روپے کا وفاقی بجٹ آج پیش ہو رہا ہے ۔ تنخواہوں اور پنشن میں پندرہ فیصد تک اضافہ متوقع ہے ۔ ٹیکس آمدن کا ہدف چار ہزار پچیس اور نان ٹیکس آمدن نو سو پچاس ارب رہنے کاامکان ہے ۔ کیا مہنگا ہوگا کیا سستا ، کس چیز پر ٹیکس زیادہ لگے گا کس چیز پر کم ، سرکاری ملازمین کی تنخواہوں اور پنشن میں کتنا اضافہ ہوگا۔
وفاقی بجٹ آج پیش ہو رہا ہے ۔بجٹ کے موصول خدوخال کے مطابق آئندہ مالی سال کے بجٹ میں دفاعی اخراجات میں 85 ارب روپے اضافے کا امکان ہے جس کے بعد بجٹ میں دفاع کیلئے 945 ارب رکھے جا رہے ہیں ۔ بجٹ میں تنخواہوں اور پنشن میں پندرہ فیصد تک اضافہ متوقع ہے جس کیلئے بالترتیب 395 اور 275 ارب روپے مختص کئے جا رہے ہیں ۔ بجٹ میں ٹیکس آمدن کا ہدف چار ہزار پچیس اور نان ٹیکس آمدن نو سو پچاس ارب رہنے کا امکان ہے ۔بجٹ میں سود اور قرضوں کی ادائیگیوں پر 16 کھرب ، ترقیاتی کاموں پر 10 کھرب ، سبسڈی اور گرانٹ کی مد میں 230 ارب روپے مختص کئے جا سکتے ہیں ۔ این ایف سی کے تحت صوبوں کو 2345 ارب روپے ملنے جبکہ بجٹ خسارہ 1475 ارب روپے رہنے کا امکان ہے ، مسلم لیگ نون کی حکومت پہلی حکومت ہوگی جو ملک کا 5 واں بجٹ پیش کرے ۔
