بیجنگ (آئی این پی) وزیر مملکت برائے انفارمیشن ٹیکنالوجی انوشہ رحمن کی انتھک محنت سے پاکستان نے ایک اور سنگ میل عبور کرلیا ، وزیر اعظم نوازشریف کا وژن مکمل ہو گیا ،آن لائن کاروبار کے فروغ کے لیے پاکستان اور چینی کمپنی علی بابا کے مابین پہلے ڈیجیٹل معاہدہ برائے معاشرتی و اقتصادی ترقی پر دستخط منگل کو ہونگے’
معاہدے سے ایک طرف پاکستان میں تیار کردہ مصنوعات کی آن لائن فروخت کو فروغ ملے گا’دوسری طرف ای کامرس سے وابستہ کمپنیوں کو اپنی تجارت کے حجم میں اضافے کے لئے وسیع مواقع میسر آئیں گے۔ اس معاہدے سے ابتدائی طور پر 140ملین صارفین مستفید ہو سکیں گے۔ تفصیلات کے مطابق پاکستان اور چین کی معروف ای کامرس کمپنی علی بابا کے مابین پاکستان کی تاریخ کے پہلے آن لائن ڈئجیٹل تجارتی معاہدے پر دستخط منگل کو ہونگے۔ اس معاہدے کے تحت پاکستان میں مقامی سطح پر تیار کردہ مصنوعات کو فروغ ملے گا۔ عام آدمی گھر میں بیٹھ کر آن لائن اپنی اشیا کو دنیا بھر میں متعارف کرواسکے گا۔ ابتدائی طور پر 140ملین موبائل اور براڈبینڈ صارفین ای کامرس کی اس سہولت سے مستفید ہونگے۔ یہ وزیر مملکت انوشہ رحمن کی انتھک کوششوں کا نتیجہ ہے کہ پاکستان علی بابا جیسی بین الاقوامی ای کامرس کمپنی کے ساتھ آن لائن ڈئجیٹل تجارتی معاہدہ کر رہا ہے۔ یوں ڈیجیٹل پاکستان کا خواب شرمندہ تعبیر ہورہا ہے۔ یہ پاکستان کی تاریخ کا سب سے پہلا ڈیجیٹل تجارتی معاھدہ ہوگا۔ پاکستان کے لوگوں کی علی بابا اور پے پال جیسی بڑی کمپنیوں کو پاکستان لانے کی دیرینہ خواہش پوری ہوگی اور ای کامرس سے وابستہ بڑی بڑی کمپنیاں پاکستان آئیں گی۔ پاکستانی صارفین تیزی سے براڈبینڈڈ کا رخ کریں گے کیونکہ ای کامرس کی ترقی اس وقت تک ممکن نہیں جب تک پاکستان میں براڈ بینڈڈ کو فروغ نہیں دیا جاتا۔
واضح رہے پاکستان میں چھوٹے اور درمیانے درجے کے کاروباری ادارے پاکستانی معیشت کے لیے ریڑھ کی ہڈی کی حیثیت رکھتے ہیں کیو نکہ انکا پاکستانی صنعت میں 80 فیصد حصہ ہے پاکستان کے 200 ملین لوگ اور 65 فیصد کام کرنے والے ان کاروباری اداروں سے وابستہ ہیں ۔ یہ منصوبہ ڈیجیٹل پلیٹ فارم اور ایم اس ایم ای آن لائن تک رسائی میں مدد دے گا اور حقیقی طور پر پاکستانی لوگوں کی آمدنی میں اضافہ کر کے پاکستان کو زیادہ آمدنی والے ملک کی فہرست میں شامل کرنے میں مددگار ثابت ہو گا ۔
