لاہور( این این آئی)صوبائی وزیر قانون رانا ثنا اللہ خان نے کہا ہے کہ عمران خان اور شیخ رشید کی خواہشات کا ہر روز جنازہ اٹھتا رہے گا اور حکومت 2018ء تک اپنی مدت پوری کرے گی ،وزیر اعظم بننے کے خواہشمند عمران خان کی شیروانی کئی سالوں سے دیوار کے ساتھ لٹکی ہوئی ہے
انہیں اندر ہی اندر اپنی عمر نکلے جانے کا غم کھاجارہا ہے ،پیپلز پارٹی اور پی ٹی آئی والے بخوبی آگاہ ہیں کہ ان کا کارکردگی میں (ن) لیگ سے دور دور تک کوئی مقابلہ نہیں۔ ایک انٹر ویو میں رانا ثنا اللہ خان نے کہا کہ عمران خان اور ان کے تباہ حال سیاسی پارٹنر اپنی ناکامیوں پر دلبرداشتہ ہیں اسی لئے جنازے اٹھائے جانے سے کم بات نہیں کرتے ۔ میں انہیں بتانا چاہتا ہوں کہ ان کی خواہشات کا ہر روز جنازہ اٹھتا رہے گا لیکن موجودہ حکومت نہ صرف 2018ء تک اپنی مدت پوری کرے گی بلکہ آئندہ عام انتخابات میں بھی (ن) لیگ ہی عوام کی طاقت سے بر سر اقتدار آئے گی ۔ انہوں نے کہا کہ عمران خان اور شیخ رشید نے جمہوریت کو نقصان پہنچانے کی جتنی سازشیں کی ہیں اس لحاظ سے ان کا نام گنیز بک آف ورلڈ ریکارڈ میں آنا چاہیے بلکہ اب تو سازشیں بھی ان سے شرما رہی ہیں۔ رانا ثنا اللہ خان نے کہا کہ وزیر اعظم محمد نواز شریف اور وزیر اعلیٰ شہباز شریف کی قیادت میں ملک ترقی کی راہ پر گامزن ہے،بجلی کا بحران بتدریج کم ہو رہا ہے اور ہماری یہی کامیابیاں سیاسی مخالفین کی زندگیوں کو تاریک کر رہی ہیں ۔
