اسلام آباد(مانیٹرنگ ڈیسک) پاکستان میں مبینہ طور پر گستاخی کا ایک اور واقعہ، پولیس نے ملزم کو گرفتار کر لیا۔ ایکسپریس ٹربیون کی رپورٹ کے مطابق پاکستان کے صوبے بلوچستان کے علاقے حب ، لسبیلہ میں مبینہ طور پر گستاخی کا ایک اور واقعہ رونما ہوا ہے۔ مقامی افراد کی شکایت پر پولیس نے 35سالہ پرکاش کمار کو گرفتار کر لیا ہے جو کہ مبینہ طور پر واٹس ایپ میسنجر کے ذریعہ گستاخانہ پیغامات ارسال کر رہا تھا۔ ایس ایس پی لسبیلہ ضیا مندوخیل نے ملزم کی گرفتاری کی
تصدیق کرتے ہوئے بتایا ہے کہ پولیس نے ملزم کو عدالت میں پیش کر دیا ہے جسے عدالتی احکامات کے مطابق جیل بھیج دیا گیا اور عدالت نے معاملے کی مزید تحقیقات کے لئے احکامات جاری کر دیئے ہیں۔واضح رہے کہ پرکاش کمار کے مبینہ طور پر گستاخانہ پیغامات پر مشتعل ہجوم نے اس کی دکان بند کرنے کیلئے پر تشدد مظاہرہ کرتے ہوئے حب پولیس سٹیشن کا گھیرائو بھی کیا اس دوران پتھرائو سے ڈی ایس پی لسبیلہ جان محمد کھوسہ اور دیگر اہلکار زخمی بھی ہو گئے ہیں۔
