اسلام آباد (این این آئی)ایف آئی اے کی خاتون اہلکار نے بینظیر بھٹو انٹرنیشنل ایئر پورٹ پر ناروے کی خاتون کوٹوائلٹ پیپرز مانگنے پر تشدد کا نشانہ بناڈالا جس کی ویڈیو بھی منظر عام پر آگئی ہے ۔متاثرہ خاتون حسینہ بیگم اپنی2 بیٹیوں کے ہمراہ ناروے جانے کیلئے بینظیر ایئر پورٹ پر موجود تھی کہ خاتون امیگریشن افیسر نے انہیں بدترین تشدد کا نشانہ ڈالا۔ حسینہ بیگم کا کہنا تھا کہ بورڈنگ کارڈ ز حاصل کرنے اور اپنا سامان عملے کے
حوالے کرنے کے بعد انکی بیٹی فوزیہ عمر ریسٹ روم میں گئی اور واپس آکر خاتون اہلکار سے ٹوائلٹ پیپرز طلب کیے۔انہوںنے کہاکہ اس بات پر ایف آئی اے کی خاتون آفیسر نوشیلا آگ بگولہ ہو گئی اور کہا کہ وہ امیگریشن ڈیپارٹمنٹ کی اہلکار ہے اور ٹوائلٹ پیپرز کی فراہمی صفائی کرنے والوں کا کام ہے میرا نہیں ۔حسینہ بیگم نے بتایا کہ خاتون اہلکار کے غصے پر فوزیہ نے اسے کہا کہ مسافروں کے ساتھ بدسلوکی کرنے کی ضرورت نہیں جس پر دونوں میں تلخ کلامی ہو گئی ۔متاثرہ خاتون نے دعویٰ کیا کہ جیسے ہی ہم امیگریشن کلیئرنس کیلئے لائن میں کھڑی ہوئیں تو اہلکار نے آکر ہمارے پاسپورٹ اور بورڈنگ کارڈز چھینے اور پھاڑدیے اور جیسے ہی میری بیٹی نے مزاحمت کی تو نوشیلا نے دیگر دو خواتین اہلکاروں کی مدد سے فوزیہ کو گھسیٹتے ہوئے ایک کمرے میں لے گئیں اور تشدد کا نشانہ بنایا ۔عینی شاہدین کا کہنا ہے کہ مسافروں اور ایف آئی اے اہلکاروں نے ایک دوسرے کو تھپڑ بھی رسید کیے اور معاملے کی سنگینی کو بھانپتے ہوئے ایف آئی اے اور ایئر پورٹ سیکیورٹی فورسز نے مداخلت کی اور فوزیہ کو چھڑا کر ایئر پورٹ پولیس کے حوالے کر دیا ۔عینی شاہدین کے مطابق ہاتھا پائی کے دوران فوزیہ کو سر اور گردن پر معمولی زخم آئے جس کے بعد اسے سول ایو ی ایشن اتھارٹی کی جانب سے طبی امداد دی گئی اور پھر بینظیر بھٹو ہسپتال منتقل کیا گیا ۔
