اسلام آباد(مانیٹرنگ ڈیسک)بھارت کا اڑی حملہ کے الزام میں گرفتار 2بے گناہ پاکستانی طلبا کیساتھ افسوسناک سلوک، واہگہ بارڈر پر توہین آمیز حالت میں پاکستان رینجرز کے حوالے ۔ تفصیلات کے مطابق اڑی حملہ کے الزام میں گرفتار پاکستان طلبافیصل اعوان اور احسن خورشید کی بے گناہی ثابت ہونے پر گزشتہ روز دونوں کو واہگہ بارڈر پر رینجرز کے حوالے کر دیاگیا ہے،

بھارتی فوجی حکام دونوں بے گناہ پاکستان طالب علموں کیساتھ افسوسناک سلوک کرتے ہوئے انہیں مجرموں کی طرح آنکھوں پر پٹی باندھ کر سرحد تک لائے۔ دونوں طلبا کا تعلق آزادکشمیر کے ایک گائوں سے ہے جو کے عید کے موقع پر سیروتفریح کی غرض سے نکلے اور غلطی سے سیز فائر لائن عبور کر کے مقبوضہ کشمیر میں داخل ہو گئے تھے جہاں اڑی حملے کے تین دن بعد انہیں بھارتی فوج نے گرفتار کر لیا تھا اور بعد میں اڑی حملے میں سہولت کار قرار دیتے ہوئے تحقیقاتی ایجنسی کے حوالے کر دیا تھا۔ واضح رہے کہ تحقیقاتی ایجنسی نے دونوں پاکستانی طلبا کو 6ماہ طویل تحقیق کے بعد بے گناہ قرار دیتے ہوئے رہائی کے بعد پاکستان روانہ کرنے کیلئے بھارتی فوج کے حوالے کیا تھا۔بھارتی فوج کے دونوں طلبا کو اڑی حملے میں سہولت کار قرار دئیے جانے کے الزام کو پاکستانی حکام نے مسترد کر دیا۔ یاد رہے کہ اڑی حملے کی تحقیقات کے سلسلے میں ایک پاکستانی تحقیقاتی ٹیم بھی بھارت جا چکی ہے۔ دونوں طلبا کو واہگہ بارڈر پربھارتی فوجی حکام نے  پاکستانی حکام کے حوالے کیا جہاں دونوں طلبا کے والدین اور عزیز و اقارب بھی موجود تھے۔ اس موقع پر کئی جذباتی مناظر دیکھنے کو ملے۔ دونوں پاکستانی طلبا نے پاکستان ،پہنچنے پر کہا کہ آج کا دن ہمارے لئے عید کا دن ہے،خوشی کے جذبات کو الفاظ میں بیان کرنا مشکل ہے۔رہا ہونے والے پاکستانی طالب علم فیصل کے بھائی نے اس حوالے سے پاکستانی حکام اور بھارت کا شکریہ بھی ادا کیا ہے