فیصل آباد(آن لائن) تھانہ بٹالہ کالونی کے علاقے نیو گارڈن ٹائون میں پاک فوج کے حاضر سروس کیپٹن کا ڈاکوئوں سے مقابلہ‘ فائرنگ کے تبادلے میں ایک ڈاکو ہلاک‘ دو فرار‘ کیپٹن بھی زخمی ‘ مرنے والے ڈاکو کی نعش ہسپتال منتقل‘ پولیس نے چھاپے مارنے شروع کر دیئے۔ آن لائن کو بتایا گیا ہے کہ گلی نمبر4نیو گارڈن ٹائون میں رہائش پذیر حساس ادارے کا کیپٹن عبد اللہ نسیم چھٹی پر گھر آیا ہوا تھا علی الصبح وہ ڈیوٹی پر جانے
کے لئے گھر سے نکلا تو کچھ فاصلے پر تین مسلح ڈاکوئوں نے اسے روک لیا اور گن پوائنٹ پر لوٹ مار کرنے کی کوشش کی ‘ کیپٹن عبد اللہ نسیم نے مزاحمت کی تو ڈاکوئوں نے فائرنگ کر دی‘ ایک گولی اس کی ٹانگ میں لگی جس سے وہ زخمی ہو گیا لیکن اس کے باوجود کیپٹن نے جرات کا مظاہرہ کرتے ہوئے اپنے سرکاری پسٹل سے جوابی فائرنگ کی جس سے ایک ڈاکو مر گیا اور اس کے دو ساتھی فرار ہو گئے‘ ہلاک ہونے والے ڈاکو کی شناخت نہ ہو سکی ہے ۔
