راولپنڈی(آئی این پی)کور کمانڈرراولپنڈی کے زیر صدارت کانفرنس میں انٹیلی جنس اداروں کو کومبنگ اورٹارگٹڈآپریشن تیز کرنیکی ہدایت کرتے ہوئے دہشتگردوں کے خفیہ ٹھکانے ختم کرنے کے عزم کا اعادہ کیاگیا جبکہ راولپنڈی ضلع کے علاقوں میں سیکیورٹی ہائی الرٹ جاری کردیاگیا اور سرچ آپریشن بڑھا دیئے گئے ہیں۔
جمعہ کو پاک فوج کے شعبہ تعلقات عامہ آئی ایس پی آر کے مطابق کور کمانڈرلیفٹیننٹ جنرل ندیم رضا راولپنڈی کی صدارت میں سیکیورٹی صورتحال کا اعلیٰ سطح جائزہ اجلاس ہوا۔اجلاس میں سیکیورٹی فورسز ،انٹیلی جنس اداروں کو کومبنگ اورٹارگٹڈآپریشن تیز کرنیکی ہدایت کی گئی،دہشتگردی کے خفیہ ٹھکانے ختم کرنے کے عزم کا اعادہ کیا۔آئی ایس پی آر کے مطابق ملک میں دہشگردی کے حالیہ واقعات کے تناظر میں راولپنڈی ضلع کے علاقوں میں سیکیورٹی ہائی الرٹ جاری کردیاگیا اور سرچ آپریشن بڑھا دیئے گئے ہیں۔ سیہون شریف میں دھماکے کے بعد راولپنڈی میں سیکیورٹی ہائی الرٹ کر دی گئی اور حساس عمارتوں کا کنٹرول پاک فوج نے سنبھال لیا۔نجی ٹی وی کے مطابق راولپنڈی شہر میں سیکیورٹی انتہائی سخت کر دی گئی اور اڈیالہ جیل کے ساتھ ساتھ بینظیر انٹرنیشنل ایئر پورٹ پر پاک فوج تعینات کر دی گئی ہے
جبکہ دیگر حساس عمارتوں کا کنٹرول بھی پاک فوج نے سنبھال لیا ۔ شہر بھرکے داخلی اور خارجی راستوں پر فوجی جوان تعینات ہیں جبکہ شہر میں داخل ہونے والوں کی پوری طرح تلاشی لی جا رہی ہے اور مساجد کے باہر ایلیٹ کمانڈوز تعینات ہونگے۔
