اسلام آباد(مانیٹرنگ ڈیسک)دو دن قبل اسلام آباد کے سیکٹر آئی ٹین تھانہ سبزی منڈی کی حدود میں پولیس اہلکار کی فائرنگ سے ہلاک ہونے والے تیمور کے کیس میں اہم پیشرفت۔ فرار پولیس اہلکار سمیع گرفتار، بیان قلمبند، مقتول کی ساتھی لڑکی نے بھی وقوعہ کا احوال کہہ ڈالا۔ تفصیلات کے مطابق دو دن قبل اسلام آباد کے سیکٹر آئی ٹین تھانہ سبزی منڈی کی حدود میں پولیس اہلکار

کے روکنے پر نہ رکنے کی پاداش میں فائرنگ سے ہلاک ہونے والے تیمور کی ساتھی لڑکی سونیا اور فرار پولیس اہلکار سمیع کا گرفتاری کے بعد بیان قلمبند کر لیا گیا ہے۔ تیمور کی دوست اور وقوعہ کے وقت گاڑی میں موجود لڑکی سونیا کے مطابق وہ اور تیمور 3سال سے دوست تھے، وہ 29جنوری کو تیمور کی سالگرہ منانے کے سلسلے میں اسلام آباد آئی تھی، سونیا نے بتایا کہ وہ ایک روز قبل رات کے کھانے سے لیکر تیمور کو گولی لگنے تک اس کے ساتھ تھی۔ ذرائع کے مطابق دوسری طرف وقوعہ سے فرار ملزم پولیس اہلکار سمیع نے اپنا بیان قلمبند کرواتے ہوئے بتایا ہے کہ اس نے آئی جی پی روڈ پر تیزی سے آتی گاڑی کو روکنے کی کوشش کی لیکن گاڑی نہ رکی اور پلاسٹک کی رکاوٹ سے ٹکراتے ہوئے تیزی سے آگے چلی گئی، گاڑی کے نہ رکنے پر اس نے دو فائر گاڑی کے ٹائر پر کئے جو مس ہوئے اور تیسرا فائر اوپر تیمور کو جالگا جس سے گاڑی بے قابو ہو کر فٹ پاتھ سے ٹکرا کر رک گئی، پمز ہسپتال میں ہوئے ابتدائی پوسٹمارٹم میں اس بات کی تصدیق کی گئی ہے کہ گولی سر کی ہڈی توڑ کر دماغ کو لگی

جو کہ موت کی وجہ بنی ۔ اس سے قبل مقتول تیمور کی دوست سونیا کی والدہ کا کہنا تھا کہ ان کی بیٹی کی تیمور سے فیس بک کے ذریعے دوستی ہوئی تھی جو کہ سالگرہ منانے اسلام آباد آئی تھی۔ ذرائع کے مطابق تیمور شادی شدہ اور دو بچوں کا باپ تھا جبکہ سونیا طلاق یافتہ ہے، تیمور اور سونیا کی دوستی سے متعلق مقتول کی اہلیہ جانتی تھی۔