اسلام آباد(آئی این پی)دفاع پاکستان کونسل کے چیئرمین مولانا سمیع الحق نے خبر دار کرتے ہوئے کہاہے کہ جماعت الدعوۃ کے سربراہ حافظ سعید کی نظربندی اور ان کی جماعت پر پابندی کے حوالے سے چین کو ملوث کرنے کی کوشش نہ کی جائے ورنہ اس کے پاک چین اقتصادی راہداری پرمنفی اثرات مرتب ہوں گے۔ہفتہ
کی شام اسلام آباد میں پریس کانفرنس کے دوران ایک سوال کے جواب میں مولانا سمیع الحق نے کہا کہ خبردار کرتا ہوں کہ متذکرہ معاملے میں چین کو ملوث نہ کیا جائے اس کا اس معاملے سے کوئی تعلق نہیں ہوسکتا اور اگر کوئی اس معاملے میں چین کو لانے کی کوشش کرتا ہے تو یہ پاکستان کے مفاد میں نہیں ہوگا اس معاملے میں چین کو ملوث کرنے سے سی پیک پر منفی اثرات مرتب ہوسکتے ہیں اور اس الزام کی وجہ سے چین اس منصوبے کے حوالے سے کوئی غیرمعمولی فیصلہ کرسکتا ہے۔
