پشاور(این این آئی)خیبرپختونخوااسمبلی نے وزیراعلیٰ سمیت وزراء ،سپیکر اوراراکین اسمبلی کی تنخواہوں میں اضافے کی منظوری دیدی، جس کے تحت اب وزیراعلیٰ کی مراعات والاؤنسزکے بغیربنیادی تنخواہ دو لاکھ ،وزراء ایک لاکھ80ہزار،اراکین اسمبلی کی80 ہزار، سپیکرایک لاکھ50ہزاراورڈپٹی سپیکرکی تنخواہ ایک لاکھ45ہزارروپے ہوگی صوبائی وزیرقانون امتیازشاہدقریشی

نے اراکین اسمبلی اور وزراء کی تنخواہوں سے متعلق بل کو پیش کیا تاہم کسی نے بل کی مخالفت نہیں کی ۔نئے ترامیم کے تحت اراکین اسمبلی کی بنیادی تنخواہ18سے بڑھاکر80ہزارروپے کردی گئی سپیکر کی تنخواہ80ہزارسے بڑھاکر1لاکھ پچاس اورڈپٹی سپیکر کی تنخواہ45سے بڑھاکرایک لاکھ45 ہزار کی گئی ۔صوبائی وزیر کی بنیادی تنخواہ35ہزارسے بڑھاکرایک لاکھ80ہزاراوروزیراعلیٰ کی تنخواہ45سے بڑھاکردولاکھ روپے کردی گئی ۔حیران کن امریہ ہے کہ تمام اراکین اسمبلی ،وزراء ،مشیروں ،سپیکروڈپٹی سپیکرسمیت تنخواہوں میں اضافہ یکم جولائی2016ء سے تصور ہوگا اورانہیں بقایاجات کی ادائیگی بھی کی جائے گی۔تنخواہوں میں اضافے کے علاوہ تمام اراکین اسمبلی وکابینہ کے اراکین کو ہاؤس رینٹ ،میڈیکل اور دیگرمراعات بھی حاصل ہونگی ۔محکمہ خزانہ کے ذرائع کے مطابق اراکین اسمبلی اب ایک لاکھ 7ہزارکے بجائے تقریباًایک لاکھ80کی ماہانہ وصولی کرینگے۔وزراء کی تنخواہ مراعات سمیت چارلاکھ کے قریب ہوگی

جبکہ وزیراعلیٰ پانچ لاکھ سے زائد کی ماہانہ تنخواہ اور مراعات کی مد میں وصول کریگا اسی طرح سپیکروڈپٹی سپیکر کے مراعات وتنخواہ بھی چارلاکھ سے اوپرہوگی ۔حالیہ خیبرپختونخوااسمبلی نے دوسری مرتبہ تنخواہوں میں اضافہ کیاہے ۔

موضوعات:خیبرپختونخوا