اسلام آباد(آئی این پی)وفاقی وزیرِداخلہ چوہدری نثار علی خان کا لاپتہ ہونے والے بلاگرز پر مقدمات قائم کرنے کے حوالے سے میڈیا رپورٹس اور خصوصا سوشل میڈیا پر جاری پراپیگنڈے کا نوٹس لے لیا ، چوہدری نثار نے لاپتہ افراد کے خاندانوں کے ساتھ اظہار ہمدردی بھی کیا ہے ، سرکاری اعلامیہ کے مطابق وزیر داخلہ نے کہا ہے کہ بلاگرز پر مقدمات قائم کرنے کی خبروں میں قطعاً کوئی صداقت نہیں اور ایسی خبریں مضحکہ خیز اور غیر سنجیدہ ہیں،بعض عناصر کی جانب سے اس معاملے میں غلط معلومات کی تشہیر کا مقصد معاملے کو مزید الجھانا ہے۔
انہوں نے کہاکہ منفی پراپیگنڈے اور غلط معلومات کی تشہیر ایسے عناصر کی بے حسی کا واضح ثبوت ہے۔ شاید ان کو اس بات کا احساس نہیں کہ انکے ایسے عمل سے کرب میں مبتلا خاندانوں کی مشکلات میں مزید اضافہ ہوگا، اس وقت حکومت کی تمام تر توجہ بلاگرز کی باخیریت بازیابی ہے اور اس سلسلے میں ہر ممکنہ کوشش جاری ہے۔
