اسلام آباد(آئی این پی)وفاقی تحقیقاتی ادارے (ایف آئی اے) نے چیئرمین سینٹ اور سپیکر قومی اسمبلی سمیت مختلف سیاسی رہنماؤں کے جعلی بنک اکاؤنٹس اور ا ن میں جعلی ٹرانزکشن کے معاملے کی تحقیقات شروع کر دیں۔ تحقیقات میں متعلقہ بنک کے عملے کو شامل تفتیش کرتے ہوئے جعلی ٹرانزکشن کرنے والوں کا پتہ چلایا جائے گا۔ ذرائع کے مطابق ایف آئی اے ان اہم شخصیات کے اصل بنک اکاؤنٹس کی تفصیلات بھی حاصل کرے گا جن کو رقوم کی منتقلی کی جعلی رسیدیں موصول ہوئی ہیں۔
ڈی جی ایف آئی اے نے چیئرمین سینٹ میاں رضا ربانی ‘ سپیکر قومی اسمبلی سردار ایاز صادق ‘ اپوزیشن لیڈر سید خورشید شاہ‘ اعتزاز احسن اور مولانا فضل الرحمن سمیت دیگر سیاسی رہنماؤں کے جعلی بنک اکاؤنٹس کھولنے اور ان میں جعلی ٹرانزکشن کی تحقیقات کی ذمہ داری ایف آئی اے کے کمرشل بنکنگ سرکل کو سونپ دی ہے۔ ذرائع کے مطابق ایف آئی اے کی ایک خصوصی ٹیم تشکیل دیدی گئی ہے جس نے اہم شخصیات کو موصول ہونے والی بنک ڈیپازٹ کی رسیدوں کی روشنی میں تحقیقات کا آغاز کر دیا ہے۔ تحقیقات میں متعلقہ بنک کے عملے اور کوریئر کمپنی کے نمائندوں کو شامل تفتیش کیا جائے گا تاکہ جعلی ٹرانزکشن کرنے والوں کا پتہ چلایا جا سکے۔ ذرائع کے مطابق ایف آئی اے ان اہم شخصیات کے اصل بنک اکاؤنٹس کی تفصیلات بھی حاصل کرے گا جن کو رقوم کی منتقلی کی جعلی رسیدیں موصول ہوئی ہیں۔
