اسلام آباد (مانیٹرنگ ڈیسک)عوامی مسلم لیگ کے سربراہ شیخ رشید نے کہا کہ اس ملک کا اصل مسئلہ یہ ہے کہ اس ملک پر چوروں کی حکومت ہے ۔ سپریمکورٹ کے باہر میڈیا سے بات کرتے ہوئے شیخ رشید نے کہا کہ یہ لوگ سپریم کورٹ میں کہتے ہیں کہ انہیں استثنیٰ حاصل ہے جبکہ قومی اسمبلی میں آکر کہتے ہیں کہ ہماری تلاشی لے لو۔ انہوں نے کہا کہ قومی اسمبلی میں یہ لوگ کہہ چکے ہیں کہ ہم احتساب کے لیے تیار ہیں اور ہم نے جو کچھ کہا ہے اس کے ثبوت موجود ہیں۔
شیخ رشید نے پیش گوئی کرتے ہوئے کہا کہ میں آج کہتا ہوں کہ جس دن نواز شریف نے سچ بول دیا وہ دن نواز شریف کی سیاست کا آخری دن ہو گا۔ میڈیا سے گفتگو میں شیخ رشید نے کہا کہ نواز شریف 20 کروڑ لوگوں کو مذاق اُڑا رہے ہیں۔ صاف چھُپتے بھی نہیں ہیں اور سامنے بھی نہیں آتے ۔ انہوں نے کہا کہ اگر نواز شریف منی ٹریل بتا دیں تو میں اپنا کیس واپس لے لوں گا اور اگر یہ ایسا کرنے میں ناکام رہے تو میں قبر کی دیوار تک پانامہ ، پانامہ ، پانامہ کہتا رہوں گا۔
