لاہور(مانیٹرنگ ڈیسک)صوبہ پنجاب کے وزیرِ قانون رانا ثناء اللہ کا کہنا ہے کہ ملک میں کام کرنے والی ایجنسیوں کے بارے میں بحیثیت صوبائی وزیر ان کی رائے کچھ اچھی نہیں ہے۔نجی ٹی وی چینل کے پروگرام ‘میں گفتگو کرتے ہوئے رانا ثناء اللہ کا کہنا تھا کہ ‘جن ایجنسیوں کے بارے میں کہا جاتا ہے کہ انھوں نے مجھے مارا پیٹا تو ان کے بارے میں کیا رائے ہوسکتی ہے۔
اس سوال پر کہ کیا ملک کی ایجنسیاں سچ بولتی ہیں یا جھوٹ؟ رانا ثناء کا کہنا تھا کہ وہ اس سلسلے میں کسی قسم کی تصدیق نہیں کرسکتے کیونکہ جب میرے بارے میں ان ہی ایجنسیوں کے ہاتھوں مار کھانے کا تاثر دیا جاتا ہے تو پھر میں کیا رائے دے سکتا ہوں؟
پروگرام کے دوران سپریم کورٹ میں جاری پاناما لیکس کیس سے متعلق بات کرتے ہوئے رانا ثناء اللہ کا کہنا تھا کہ جب سے وزیراعظم نواز شریف سیاست میں آئے ہیں، ان کا تو خود اپنے خاندان کے کاروبار سے بھی تعلق نہیں ہے، لہذا پاناما لیکس میں ان پر الزام عائد کرنا نامناسب ہے۔صوبائی وزیر کا کہنا تھا کہ پاناما لیکس میں جتنی بھی آف شور کمپنیاں سامنے آئی ہیں، ان میں کسی ایک جگہ پر بھی نواز شریف کا نام نہیں ہے۔
ہم شروع دن سے یہی بات کررہے ہیں۔رانا ثناءاللہ نے واضح کیا کہ نواز شریف نے آج تک جو دولت بھی کمائی وہ حلال ہے اور ماضی میں جانے سے پہلے صرف گزشتہ 8 سالوں پر نظر ڈالیں تو جو کام پنجاب میں ہوئے اور جو اب وفاق میں آنے کے بعد کیے گئے، ان سے یہ بات ثابت ہوجائے گی۔

موضوعات:رانا ثنا اللہ