لاہور( این این آئی)پیپلز پارٹی کے مرکزی رہنما و سابق وزیر داخلہ رحمان ملک نے کہا ہے کہ اپنے پاس لکھ کر رکھ لیں آئندہ ملک کا وزیر اعظم بلاول بھٹو زرداری ہوگا ،جو نادان دوست کہہ رہے تھے پیپلز پارٹی ختم ہو گئی وہ آج دیکھ لیں ،ملک میں جوبھی قانون بنتا ہے اس کا تجربہ سب سے پہلے پیپلز پارٹی پر کیا جاتا ہے ، جو قانون آصف علی زرداری کیلئے استعمال کیا گیا آج ا س کو دوسروں کیلئے کیوں استعمال نہیں کیا جارہا ۔ بلاول ہاؤس میں یوم تاسیس کی تقریب میں شرکت کے موقع پر میڈیا سے گفتگو کرتے ہوئے رحمان ملک نے کہا کہ سیاسی مخالفین دیکھ لیں بلاول بھٹو لاہور آگیا ہے ۔ جو وژن شہید ذوالفقار علی بھٹو اور شہید محترمہ بینظیر بھٹو کا تھا وہی بلاول بھٹو کی آنکھوں میں نظر آتا ہے۔پنجاب میں جو خلاء پیدا ہوا تھا وہ بھرتا ہوا نظر آئے گا اور یہ صرف آئندہ چند ہفتوں کی بات ہے ۔
انہوں نے کہا کہ اگر بلاول بھٹو کی مقبولیت میں اضافہ ہو رہا ہے تو کسی کو تکلیف نہیں ہونی چاہیے ۔ اگر کوئی بلاول کی طرح نہیں بن سکتا تو اس کی نقل ہی کر لے ۔انہوں نے کہا کہ پیپلز پارٹی غریب کی جماعت ہے اور آج اسی منشو رکو لے کر چل رہے ہیں ۔ پیپلز پارٹی کو ختم کرنے کیلئے آمروں اور دوسرے لوگوں نے بڑا زور لگایا ۔ پیپلز پارٹی کو جتنا دبایا گیا یہ اتنی ابھر کر سامنے آئی ۔ انہوں نے کہا کہ ہم الزامات کا سامنا کریں گے اور اس کا جواب دیں گے ۔ یہاں جوبھی قانون بنتا ہے اس کا تجربہ پیپلز پارٹی پر کیا جاتا ہے ۔ جو قانون آصف علی زرداری کے لئے تھا آج دوسرے لوگوں پر اس کا استعمال کیوں نہیں کیا جارہا ۔ انہوں نے کہا کہ پنجاب پیپلز پارٹی کا ہے اور اس نے عوام کے لئے جانوں کی قربانیاں دی ہیں۔ پیپلز پارٹی کے سینئر رہنما جہانگیر بدر جب دنیا سے رخصت ہوئے تو ان کے جسم پر کوڑوں کے نشان تھے اور یہ انہوں نے عوام کے لئے کھائے تھے۔ انہوں نے کہا کہ میر بات لکھ لی جائے آئندہ ملک کا وزیر اعظم بلاول بھٹو زرداری ہوگا۔