لاہور (ا ین این آئی) اداکارہ قسمت بیگ کے قتل کی تفتیش میں اہم پیشرفت سامنے آئی ہے ،بیانات میں تضاد پر سیکرٹری سمیت چار افراد کو گرفتار کر لیا گیا ۔ نجی ٹی وی نے ذرائع کے حوالے سے بتایا کہ پولیس اداکارہ قسمت بیگ کے قتل کیس کی تفتیش میں مصروف ہے اور بیانات میں تضاد پر چار افراد کو حراست میں لیا گیا ہے ۔

اداکارہ ماہ نور اور اسکے دوست کو بھی حراست میں لے لیا گیا ۔ اداکارہ کی والدہ کا کہنا ہے کہ علی بٹ مقتولہ کا دیرینہ دوست بھی تھا ۔ دوسری جانب شامل تفتیش افراد میں قسمت بیگ کا سابق شوہر رانا مزمل بھی شامل ہے ۔جبکہ قسمت بیگ کے سیکرٹری کو بھی تفتیش کے لئے حراست میں لیا گیا ہے ۔ یاد رہے کہ اداکارہ قسمت بیگ کو 24 نومبر کو نامعلوم افراد نے گولیاں مار کر قتل کر دیا تھا ۔